रामेछाप- रामेछाप जिल्लाका प्रमुख जिल्ला अधिकारी लिला कुमारी केसी पाण्डेले राष्ट्रिय बाणिज्य बैंकले सुरक्षित, गुणस्तरीय र प्रतिपर्धात्मक सेवा दिनुपर्ने कुरालाई जोड दिनु भएको छ । शुक्रबार राष्ट्रिय बाणिज्य बैंक मन्थलीको ५५ औं बार्षिक उत्सबको अवसरमा आयोजित एक कार्यक्रममा प्रजिअ केसीले निजी क्षेत्रको बैंकहरुले दिने सेवा जस्तै राष्ट्रिय बाणिज्य बैंकले पनि सुरक्षित, गुणस्तरीय र प्रतिपर्धात्मक सेवा दिनु पर्नेमा जोड दिनुभएको हो ।
बैंकिङ अपराध घटाउने तर्फ लाग्नु पर्ने र नागरिकको गुनासो सुन्ने ब्यवस्था समेत बैंकले सुरु गर्नुपर्ने उहाँको भनाई रहेको छ । प्रजिअ केसीले नेपाल सरकारको समेत स्वामित्वमा रहेको राष्ट्रिय वाणिज्य बैकले अरु नीजि बैक सरह सेवा सुबिधा प्रदान गर्न सक्नु पर्ने बताउनु भयो । उहाँले बैकले स्वरोजगार क्षेत्रमा बढि कर्जा लगानी गर्नु पर्ने कुरालाई पनि जोड दिनुभयो ।
कार्यक्रमका अबसरमा बोल्दै मन्थली नगरपालिका वडा नं १ का वडा अध्यक्ष नारायणदाश श्रेष्ठले बैंकले कर्जा प्रवाह र नबिकरणका लागि नागरिकहरुलाई धेरै झन्झट नदिइ केहि कुराहरु ब्यवहारिकतालाई हेरेर काम गर्न अनुरोध गर्नुभयो । कार्यक्रममा बोल्दै नेपाल पत्रकार महासंघका अध्यक्ष रमेश ढुंगेलले यस्ता बार्षिक उत्सबको अबसरमा बढी कारोवार गर्ने ब्यक्ती वा कम्पनी, असल ऋणी र बढी भन्दा बढी राष्ट्रिय वाणिज्य बैंकको समाचार प्रकाशन र प्रसारण गर्ने सञ्चारकर्मी वा संञ्चारगृहहरुलाई सम्मान गर्न सके बैक राष्ट्रिय वाणिज्य बैंकप्रतिको आकर्षण र बिश्वसनियता बृद्धि भइ अन्य बैंकको तुलनामा बढी समाचारहरु प्रकाशन हुने बताउनुभयो । उहाँले बैकले गरेका गतिबिधिहरु कम्तीमा ६ महिनाको अवधिमा सार्बजनिक गरी नागरिकहरुलाई सूचनाको हक प्रत्याभुति गराउन पनि अनुरोध गर्नुभयो ।
कार्यक्रमका अबसरमा रामेछाप उद्योग बाणिज्य संघका नव निर्बाचित अध्यक्ष केशब प्रसाद घिमिरेले उद्योगी र ब्यवसायिहरुलाई सजिलो हुने गरी काम गरिदिन आग्रह गर्नु भयो । त्यस्तै उद्योग बाणिज्य संघका निबर्तमान अध्यक्ष श्याम थापालले बाणिज्य बैंकले साना ठूला ब्यवसायि र उद्योगीहरुको मन जितेर काम गर्नु पर्नेमा जोड दिनुभयो ।
बैंकका प्रबन्धक रबिन्द्र मण्डलको अध्यक्षतामा सम्पन्न उक्त बार्षिक उत्सको उद्घाटन प्रमुख जिल्ला अधिकारी एबं कार्यक्रमकी प्रमुख अतिथि लिला कुमारी केसी पाण्डेले पानसमा बत्ति बालेर गर्नु भएको थियो ।
कार्यक्रमका अबसरमा राष्ट्रिय वाणिज्य बैंकले चालु आर्थिक बर्षको ६ महिनाको अबधिमा (२०७६ पुष मसान्त सम्म) २ करोेड १ लाख ११ हजार नाफा कमाएको र मन्थलीमा बैंक स्थापना भए देखि हाल सम्म ७३ करोड ४४ लाख कर्जा लगानीमा रहेको प्रबन्धक मण्डलले बताउनुभयो ।
कार्यक्रममा सहायक प्रबन्धक नानुमाया गदालले स्वागत मन्तब्य राख्नु भएको थियो भने बैंक क्यासियर सुदर्शन पौडेलले कार्यक्रम सञ्चालन गर्नु भएको थियो ।
यो बारेमा तपाईको प्रतिकृया