७ बैशाख, २०७६
रामेछाप– प्रदेश नम्बर तीनका सांसद शान्तिप्रसाद पौडेलले रामेछापका सहकारीहरुले उत्पादन मूलक क्षेत्रमा लगानी गर्नुपर्नेमा जोड दिनुभएको छ । शनिबार मन्थलीमा गौरीशंकर क्लस्टरको १८ औं कार्यकुशलता तथा सिकाई व्यवस्थापन कार्यशाला गोष्ठीमा बोल्दै सांसद पौडेलले जिल्लाका सहकारीहरुले उत्पादन मूलक क्षेत्रमा भन्दा अन्य क्षेत्रमा बढी लगानी गरेको देखिएकाले त्यसो गर्न नहुनेमा जोड दिनुभएको हो ।
उहाँले आगमी दिनमा सबै सहकारीहरुले शेयर सदस्यहरुलाई प्रत्यक्ष फाइदा पुग्ने गरि काममा लाग्न पनि आग्रह गर्नुभयो । संसाद पौडेलले प्रदेश तीन सरकारले सहकारी ऐन बनाइसकेकोले त्यसको कार्यन्वयले सहकारीको संस्थागत विकासमा थप टेवा पुग्ने बताउनुभयो । त्यस्तै कार्यक्रममा बोल्दै जिल्ला बचत तथा ऋण सहकारी संघ रामेछापका अध्यक्ष जगन्नाथ दाहालले सहकारीमा शेयर सदस्यहरुले खाता खोलेर बचत गर्नु र सहज तरिकाले ऋण पाउनु मात्रै राम्रो नभएको बताउतै त्यो भित्र सहकारीको अस्तव्यस्तताको बारेमा राम्रो अध्ययन गर्नु पर्ने बताउनुभयो । अध्यक्ष दाहालले जिल्लामा संचालित सहकारीहरुले आफ्नो गुणस्तरियता कायम राख्दै शेयर सदस्यहरुको सम्पत्तीलाई सुरक्षित गर्नुपर्नेमा जोड दिनुभयो ।
त्यसैगरी कार्यक्रममा नवजागरण बचत तथा ऋण सहकारी संस्था लिमिटेड मन्थलीका अध्यक्ष श्याम थापाले सहकारीहरु बीच एकआपसमा सहकार्य नहुँदा बैंकहरुसँग प्रतिस्पर्धाले थप चुनौती थपिदै गएको बताउनुभयो । गोष्ठीमा गौरीशंकर कलस्टर अन्तरगत रामेछाप र दोलखा गरी १० ओटा सहकारीहरुको सहभागिता रहेको छ । वैठकमा सबै सहकारीहरुले गत तीन महिनाको अवधिमा गरेका प्रगति र आगमी तीन महिना भित्र आफ्नो सहकारीलाई उत्कृष्ठ बनाउने गरी कार्ययोजना समेत तयार गरेका छन् । नवजागरण बचत तथा ऋण सहकारी संस्था लिमिटेड मन्थलीको आयोजना तथा नेपाल बचत तथा ऋण केन्द्रिय सहकारी संघ लिमिटेडको प्राविधिक सहयोगमा कार्यक्रम भएको हो ।
यो बारेमा तपाईको प्रतिकृया