सुकाजोर- रामेछाप नगरपालिकाका नगर प्रमुख नर बहादुर थापामगरले स्थानीय सरकार भनेकै स्थानीय नागरिकको समस्या बुझ्ने सबै भन्दा नजिकको सरकार भएको बताउनुभएको छ । सोमबार रामेछाप नगरपालिकाको वडा नम्बर ७ सुकाजोरमा अपाङ्गता भएका व्यक्तिहरुलाई अपाङ्गता परिचयपत्र वितरण कार्यक्रममा अपाङ्गता भएका व्यक्तिहरुले भोग्नु परेको पीडालाई स्मरण गर्दै नगर प्रमुख थापामगरले उनिहरुले भोग्दै आएको पीडालाई न्यूनीकरण गर्नको लागि रामेछाप नगरपालिका लागीरहेको बताउनुभएको हो ।
नगरपालिका सम्म आउन नसक्ने अपाङ्गता भएका व्यक्तिहरुलाई लक्षित गरी वडा कार्यालयबाट परिचय पत्र वितरण कार्यक्रमले उनिहरुलाई निकै फाइदा पुगेको नगर प्रमुख थापामगरको भनाई रहेको छ । उहाँले अपाङ्गता भएका व्यक्ति र जेष्ठ नागरिकलाई दिर्घकालिन फाइदा पुग्ने गरी नगरपालिकाले योजना नै बनाएर अगाडी बढ्ने प्रतिबद्धता जनाउनुभयो । अपाङ्गता भएका व्यक्तिहरुको सामाजिक मुद्दामा सबै एक जुट भएर लाग्नु पर्नेमा पनि उहाँको जोड रहेको छ ।
सुकाजोरमा ९० जना जेष्ठ नागरिक र ११ जना अपाङ्गता भएका व्यक्तिले पाए परिचयपत्र
गत आइतबार देखि संचालन भएको अपाङ्गता परिचय पत्र वितरणको घुम्ती सिविरमा सोमबार रामेछाप–७ सुकाजोरमा ११ जना अपाङ्गता भएका व्यक्ति र ९० जना जेष्ठ नागरिकलाई जेष्ठ नागरिक परिचयपत्र वितरण गरिएको छ । स्थानीय सरकार आउनु भन्दा पहिला महिला तथा बालबालिकाको कार्यालयले वितरण गर्दै आएको अपाङ्गता परिचय पत्र स्थानीय सरकार आए पछि बनेको स्थानीय अपाङ्गता समन्वय समितिले नविकरण तथा नयाँ जारी गर्न थालेको छ ।
गत आइतबार देखि रामेछाप नगरपालिका वडा नम्बर १ गोठगाउँबाट सुरु भएको घुम्ती सिविरमा स्थानीय अपाङ्गता समन्वय समितिकी संयोजक एवं रामेछाप नगरपालिकाकी उपप्रमुख सृजना खड्का, सम्बन्धित वडाका वडाध्यक्ष, रामेछाप नगरपालिकाका अधिकृत नारायण सुवेदी, डा.निशान्त भण्डारी, समितिका पदाधिकारी, विषयगत शाखाका कर्मचारी लगायतको सहभागिता रहेको छ ।
मंगलबार रामेछाप ९ ल्याङल्याङमा सिविर हुने रामेछाप नगरपालिकाका अधिकृत नारायण सुवेदीले जानकारी दिनुभयो ।
यो बारेमा तपाईको प्रतिकृया