३० साउन, २०७६
मन्थली- रामेछापको सदरमुकाम मन्थलीमा संचालित अटोले जोखिम मोलेर क्षमता भन्दा बढी यात्रु बोकेको गुनासो आए पछि जोखिमलाई न्यूनीकरणको लागि एउटा आटोले क्षमता (तीन जना) भन्दा बढी यात्रु बोक्न नपाउने गरी निर्णय भएको छ । विहिबार प्रमुख जिल्ला अधिकारी लिला कुमारी केसी पाण्डेको अध्यक्षतामा बसेको सर्वपक्षिय बैठकले नयाँ भाडादर कायम गरी क्षमता अनुसार यात्रु बोक्ने गरी निर्णय गरेको हो ।
मन्थलीको देबकोटा चोक देखि नजिकका स्थानहरुमा नयाँ भाडादर कायम गरिएको र उक्त नयाँ भाडा साउन ३१ गते देखि लागु हुने गरी निर्णय गरिएको प्रमुख जिल्ला अधिकारी केसी पाण्डेले जानकारी दिनुभयो ।
त्यस्तै अटोले यात्रु बाहेक अन्य सामाग्री बोक्न नपाउने सहमती भएको पनि उहाँले बताउनुभयो । निर्धारण गरिएको नयाँ भाडादर पूर्ण रुपमा कार्यान्वयन गराउनको लागि यात्रु र सरोकारवालाहरु बढी सचेत हुनुपर्ने उहाँको भनाई रहेको छ । अटो चलाउनको लागि जिल्ला भरीको अनुमती भए पनि जोखिम युक्त ठाउँहरुमा अटो नचलाउन अटो व्यवसायिहरुलाई आग्रह गरिएको पनि प्रजिअ केसी पाण्डेले जानकारी दिनुभयो ।
बैठकमा अटो व्यवसायि, जिल्ला ट्राफिक प्रहरी, राजनीतिक दल, सरोकारवाला लगायतको सहभागिता रहेको थियो । अहिले मन्थलीमा दुई दर्जन भन्दा बढी अटो संचालनमा रहेका छन् ।
यो बारेमा तपाईको प्रतिकृया