१३ भदौ, २०७६
रामेछाप- रामेछाप नगरपालिकाले आफ्नो नगर भित्र रहेका २५ सय छात्रालाई निशुल्क स्यानिटरी प्याड वितरण गर्ने भएको छ । नगरभित्र संचालित विद्यालयहरुमा अध्ययनरत छात्रा विद्यार्थीहरुलाई महिनावरी भएको बेला प्रयोग गर्ने घरेलु स्यानिटरी प्याड बितरण गर्न थालेको छ ।
नगरपालिकाले वडा नम्बर १ मा रहेको गोठगाउँको चण्डेश्वरी मावि र वडा नम्बर ३ मा रहेको साँघुटारको हिमगंगा उमाविका छात्राहरुलाई स्यानिटरी प्याड वितरण गरेर अभियानको सुरुवात गरेको हो ।
विद्यालयमा अध्ययनरत छात्राहरुले महिनावरी भएको बेला भोग्नु परेको समस्यालाई ध्यानमा राखेर नगर भित्रका सबै विद्यालयका छात्राहरुलाई निशुल्क रुपमा घरेलु स्यानिटरी प्याड वितरण गर्न थालिएको नगरपालिकाकी उपप्रमुख सिर्जना खड्काले बताउनुभयो । उहाँले भन्नुभयो– ‘एक जना छात्राले एक वर्षमा कम्तिमा पनि तीन हजार बराबरको प्याड प्रयोग गर्छन्, सबै छात्राहरुसँग पैसा पनि हुँदैन जसको कारण पढाई नै छोडेर घरमा बस्न बाध्य हुन्छन्, एउटा प्याड लगाउन नपाउँदा विद्यालय नै छाड्नु पर्ने बाध्यता नहोस भनेर एक वर्षलाई पुग्ने प्याड वितरण गर्न लागेका छौँ यसले उनीहरुलाई थोरै भए पनि सहयोग पुग्छ ।’
नगरपालिकाका सबै माविहरुमा अध्ययनरत करिब २५ छात्राहरुलाई निशुःल्क रुपमा स्यानिटरी प्याड वितरण गरिने समेत उपप्रमुख खड्काले बताउनुभयो ।
नगरपालिकाले निशुल्क प्याड वितरण गरेसँगै घरमै बसेर उत्पादन गर्न सकिने घरेलु स्यानिटरी प्याड बनाउने महिलाहरुले पनि रोजगारी पाएका छन् । नगरपालिकाले यस अघि ९ ओटै वडाका १८ जना महिलाहरुलाई सहभागी गराई घरेलु स्यानिटरी प्याड बनउने तालिम दिएको थियो ।
स्थानीय स्तरमै उत्पादन गरिएको घरेलु स्यानिटरी प्याड पुनः सफा गरेर धेरै पटक प्रयोग गर्न सकिने भएकाले कम खर्चिलो हुने प्याड उत्पादनमा सहयोग गरेको ग्रामिण विजनेश प्रमोशन प्रालि रामेछापका अध्यक्ष गुन्ज बहादुर कार्कीले बताउनुभयो । स्थानीय स्तरमै उत्पादन गरिएको प्याड केमिकल रहित हुने हुँदा यसको प्रयोगले महिलाहरुलाई कुनै हानी नहुने स्त्री रोग विशेषज्ञहरुको भनाई रहेको छ ।
यो बारेमा तपाईको प्रतिकृया