‘दशैँको मौका छोप्ने गाडीहरु प्रहरीको नियन्त्रणमा हुन्छन्’ : डि.एस.पी. भट्टराई

३० भदौ, २०७६

मन्थली- रामेछापका प्रहरी प्रमुख सन्तोष कुमार भट्टराईले दशैँको मौका छोपी यात्रु ठग्ने यात्रुबाहाक सवारीसाधनलाई सूचना पाउन साथ दशैभरी चल्न नदिने गरी बन्द गरिदिने चेतावनी दिनुभएको छ । जिल्ला ट्राफिक प्रहरी कार्यालय रामेछापले दशैँ ताका यात्रुबाहक सवारीसाधनले विभिन्न बहानामा यात्रुलाई ठग्न सक्ने भएकाले त्यसको न्यूनिकरणको लागि सोमबार आयोजना गरेको ट्राफिक ब्यवस्थापन सम्बन्धी अन्तरक्रिया कार्यक्रममा प्रहरी कार्यालयको दशैँ लक्षित योजना प्रस्तुत गर्दै यस्तो चेतावनी दिनुभएको हो । उहाँले जिल्लाको मुख्य–मुख्य ठाउँ सेलेघाट, सित्खा, खिम्ती, लुवुघाट, धोवी लगायतका प्रहरी इन्चार्जहरुलाई विभिन्न ठाउँमा जाने यात्रुबाहाक सवारीसाधनलाई चेकजाँचमा कडाई गर्न निर्देशन समेत दिनुभएको छ ।

प्रमुख जिल्ला अधिकारी लिला कुमारी केसी पाण्डेको अध्यक्षतामा सम्पन्न भएको अन्तरक्रिया कार्यक्रममा पूर्व सांसद देवशंकर पौडेलले आफ्नो क्यूमा नचल्ने, आफुखुसी यात्री चढाउदै हिड्ने सबै सवारीसाधनलाई सम्बन्धित निकायले कारबाहीको दायरमा ल्याउनु पर्ने माग राख्नुभयो । जिल्ला समन्वय समिति रामेछापका प्रमुख प्रेम बहादुर खड्काले जिल्लाको ट्राफिक व्यवस्थापनको काम ट्राफिक प्रहरीले मात्रै गर्न नसक्ने भएकाले स्थानीय सरकार, आम नागरिक, सवारीसाधन धनी, सवारी चालक, यात्रु लगायतले नियमलाई पालन गरी आ–आफ्नो क्षेत्रबाट सहयोग गर्नुपर्नेमा जोड दिनुभयो ।

त्यसैगरी मन्थली नगरपालिकाका नगर प्रमुख रमेश कुमार बस्नेतले यात्रुहरुको सहजतालाई ध्यानमा राखेर मन्थली बजारको फुटपथमा देखिएको समधानको लागि केही समयबाटै सुधारको काम थाल्ने बताउनुभयो । त्यस्तै चाडपर्वलाई लक्षित गरी मन्थली नगरपालिकाले नगर क्षेत्रभिको सडकलाई सुधार गर्ने काम गरीरहेको जानकारी समेत प्रमुख बस्नेतले गराउनुभएको छ ।

त्यस्तै यातायात ब्यवसायि सहितको सर्बपक्षिय अन्तरक्रियामा जिल्ला ट्राफिक प्रमुख होम बहादुर भित्रिकोटीले जिल्लाभरीको ट्राफिक व्यवस्थापनको लागि सबै सरोकारवाला निकायहरुसँग समन्वय गरेर जाने योजनामा जिल्ला ट्राफिक कार्यालय रहेको जानकारी गराउनुभयो । अन्तरक्रिया कार्यक्रममा मन्थली–१ का वडाध्यक्ष नारायणदश श्रेष्ठ, नेकपा रामेछापका नेता आनन्द श्रेष्ठ, नेपाली काग्रेस रामेछापका सचिब लेख बहादुर कार्की, उद्योग बाणिज्य संघ रामेछापका अध्यक्ष श्याम थापा, नेपाल पत्रकार महासंघ ३ नम्बर प्रदेशका सदस्य बद्री नयाँघरे, पत्रकार महासंघ रामेछापका अध्यक्ष रमेश ढुङ्गेल लगायतले आफ्नो भनाई राख्दै ट्राफिक व्यवस्थापनमा देखिएका समस्या, चुनौती र समधानको लागि सबै लाग्नु पर्नेमा जोड दिएका छन् ।

यातायात ब्यवसायिहरुले दशै तिहारमा नियमभित्रै रहेर नियमित रुपमा काउन्टर बाटनै यात्रुवाहक गाडीहरुको टिकट काटेर संचालन गरिने प्रतिबद्धता जनाएका छन् ।