रामेछाप- रामेछापमा दुई दिन देखि इन्टरनेट सेवा अबरुद्ध हुँदा हजारौ प्रयोगकर्ताहरु मारमा परेका छन् । इन्टरनेट सेवाको प्रमुख माध्यमको रुपमा रहेको नेपाल टेलिकमको (एडिएसएल) इन्टरनेट सेवा सोमबार मध्यन्न देखि मंगलबार साँझ सम्म पनि नियमित अवरुद्ध भइरहँदा हजारौं प्रयोगकर्ताहरु मारमा परेका हुन् ।
नेपाल टेलिकमबाट प्रवाह हुने एडिएसएल सेवा अवरोध हुँदा सरकारी तथा गैर सरकारी कार्यालयको काम प्रभावित भएको छ । एडिएसएल सेवा बन्द हुँदा विशेष गरी वित्तीय संस्थाहरू, बैंकिङ सेवा बढी मारमा परेका छन् भने जिल्लामा रहेका संचार माध्यमहरु, नीजि कम्पनी लगायतका क्षेत्रलाई समेत इन्टरनेटबाट गर्नु पर्ने काममा समस्या आएको छ ।
इन्टरनेट किन नआएको ?, भन्ने प्रयोगकर्ताहरुको जिज्ञसामा नेपाल टेलिकमले केही समयमा आउँछ भन्ने जवाफ सोमबार देखि नै दिए पनि मंगलबार साँझ सम्म सेवा सुचारु नहुँदा सेवाग्राही नेपाल टेलिकमको सेवाप्रति थप आक्रोसित बनेका छन् ।
जिल्लाको ग्रामिण भेगबाट विभिन्न काम लिएर सदरमुकाम मन्थली आएका सयौँ नागरिक इन्टरनेटकै माध्यमबाट हुने काम नभएपछि कतिदिन इन्टरनेटलाई कुरेर बस्नु पर्ने हो भन्ने अन्यौलमा परेका छन् ।
दुई दिन देखि अबरुद्ध भएको इन्टरनेटको विषयमा अप्टिकल फाइबरमा दोललघाटको सुकुटेमा समस्या आएको र त्यसको मर्मत कार्य भइरहेको नेपाल टेलिकम रामेछापका प्रमुख विष्णु भण्डारीले बताउनुभयो । काठमाण्डौबाट धुलिखेल, लामासाँघु, चरिकोट हुँदै रामेछाप ल्याईएको फाइबरमा समस्या आएको उहाँको भनाई रहेको छ ।
उहाँले भन्नुभयो– ‘अप्टिकल फाइबरमा सिग्नल लस भएका कारण त्यस्तो समस्या आएको हो, समस्या आएको जानकारी पाएदेखि नै मर्मतको काम भइरहेको छ, त्यहाँ आवश्यक उपकरण अन्य ठाउँबाट झिकाएर जडन भइरहेको छ, यति समयमा बन्छ भनेर समय तोक्न नसके पनि सेवाग्राहीको समस्यालाई ध्यानमा राखेर चाँडै सेवा दिन्छौँ ।’
दुई दिन सम्म सेवा अबरुद्ध हुँदा ग्राहाकलाई घाटा भयो नी भन्ने हाम्रो जिज्ञसामा उहाँले भन्नुभयो– ‘ग्राहाकले पैसा तिरेको तर इन्टरनेट प्रयोग गर्न नपाएको भन्ने विषयमा हामी केन्द्रमा जानकारी गराउँछौ, ग्राहकलाई मर्क नपर्ने गरी पछि सेवा थपिदिन सकिन्छ ।’
रामेछाप नेपाल टेलिकमबाट प्रवाह हुने एडिएसएल सेवा अवरुद्ध भएको यो नै पहिलो घटना भने हैन् । यस्ता समस्या नियमित आइरहे पनि कार्यालयले दिगो समधानको उपाय नखोज्दा आफूहरुलाई मर्क पर्ने गरेको सेवाग्राहीको गुनासो रहेको छ ।
यो बारेमा तपाईको प्रतिकृया