रामेछाप– कोरोना भाइरस नियन्त्रणको लागि देश लकडाउनमा रहेको बेला ट्राफिक व्यवस्थापनको लागि अग्रपक्तीमा रहेर काम गरीरहेका रामेछापका ट्राफिक प्रहरीका लागि त्रिवेणी दर्शन यातायात प्रालिका अध्यक्ष सुदिप थापा र मन्थली ३ कठजोरका युवा प्रदिप रोक्काले व्यक्तिगत सुरक्षाका सामग्री उपलब्ध गराएका छ । ट्राफिक व्यवस्थापनको लागि रातदिन सडकमै रहेर काम गर्ने ट्राफिक प्रहरीहरु व्यक्तिगत सुरक्षाका सामग्री नलगाई सडकमा बस्दा आफू र आफ्नो सम्पर्कमा आउने जोकेहीलाई पनि कोरोनाको जोखिम कम होस भन्ने उद्देश्यले पाँच जना ट्राफिक प्रहरीलाई पुग्नेगरी सुरक्षाका साग्री उपलब्ध गराईएको उनिहरुले बताएका छन् ।
ट्रेड युनियन काँग्रेस रामेछापका अध्यक्ष पूर्ण सुवेदीले उक्त सामग्री शनिबार जिल्ला ट्राफिक कार्यालय रामेछापका प्रमुख रामेश्वर पाण्डेलाई हस्तान्तरण गर्नुभएको हो ।
पाँच जना ट्राफिक प्रहरीका लागि पिपिई सेट ५ थान, गुणस्तरिय माक्स ५ थान र आई ग्लास पाँच थान उपलब्ध गराईएको त्रिवेणी दर्शन यातायात प्रालिका अध्यक्ष सुदिप थापाले जानकारी दिनुभयो । आफ्नो र मन्थली नगरपालिका वडा नम्बर ३ कठजोरका युवा प्रदिप रोक्काको सहयोगमा उक्त सामग्रीहरु दिइएको पनि अध्यक्ष थापाले बताउनुभयो ।
मन्थली नगरपालिका वडा नम्बर ३ कठजोर तरुणदलका अध्यक्षसमेत रहनुभएका रोक्काले भन्नुभयो– ‘कोरोना भाइरसका कारण व्यक्तिगत सुरक्षाका सामग्री नहुँदा ट्राफिक प्रहरी मात्रै हैन यातायातका साधनमा चढ्ने यात्रु र चालक, ढुवानीका साधन चलाउने चालक तथा पैदलयात्रु समेत उच्च जोखिममा हुने हुँदा हामीले अहिले पाँच जनालाई पुग्ने सुरक्षाका सामग्री पठाएका छौँ, बाँकी ट्राफिक प्रहरीलाई समेत पुग्नेगरी चाँडै उपलब्ध गराउने छौँ ।’
रोक्काले यस अघि लकडाउनको कारण काठमाण्डौमा समस्यामा परेका कठजोरका स्थानीयहरुलाई गाउँ सम्म ल्याउनको लागि पनि सहयोग गर्नुभएको थियो ।
यो बारेमा तपाईको प्रतिकृया