रामेछाप- पश्चिम रुकुमको चौरजहारी नगरपालिका वडा नंम्बर ८ सोति निवासी सुष्मा मल्लसँगको अन्तरजातीय प्रेम विवाह गर्न गएका जाँजरकोट भेरी नगरपालिकाका नवराज विक सहितको टोलीमाथि आक्रमण गरी ज्यान लिनेहरुमाथि कारबाहीको माग गर्दै रामेछापका दलित अधिकारकर्मीहरुले गृहमन्त्रालयलाई ज्ञापन पत्र बुझाएका छन् । विहिबार प्रमुख जिल्ला अधिकारी मार्फत अन्तरजातीय प्रेम गरेकै कारण घटाईएको ‘रुकुम चौरजहारी हत्या काण्ड’ बारे सत्य तथ्य छानविन गरि व्यक्तिको हत्यामा संलग्न दोषीहरुलाई हदैसम्मको कानूनी कारबाही गर्न, मृतक नवराज विक, लोकेन्द्र सुनार, टिकाराम विक, सञ्जु विक र गणेश बुडामगरलाई साँस्कृतिक शहिद घोषणा गर्न माग गर्दै बेपत्ता पारिएका एक युवाको स्थिति सार्वजनिक गर्न अनुरोध गर्दै ज्ञापन पत्र बुझाएका हुन् ।
दलित अधिकारकर्मी तथा नेकपा रामेछाप सचिवालय सदस्य समेत रहनुभएका उद्धव रम्तेल सहित २० जना अधिकारकर्मीले हस्तक्षर गरेको उक्त ज्ञापन पत्रमा संवैधानिक रुपमा बर्जित भईसकेको जातिय विभेदजन्य सामाजिक अपराधलाई प्रश्रय दिदैँ अन्तरजातीय प्रेम गरेकै कारण घटाईएको रुकुम चौरजहारी हत्या काण्डबारे सत्य तथ्य छानविन गरि व्यक्तिको हत्यामा संलग्न दोषीहरुलाई हदैसम्मको कारबाहीको माग गर्दै पीडित परिवारलाई उचित क्षतिपूर्ती उपलब्ध गराउन र यस्ता पासविक घटना समाजमा नदोहोरिने ग्यारेन्टी गर्न गृहमन्त्रीज्यू मार्फत नेपाल सरकार समक्ष जोडदार माग गरिएको छ ।
प्रमुख जिल्ला अधिकारी रुद्रादेवी शर्माले ज्ञापन पत्र बुझ्दै उक्त ज्ञापन पत्र सम्बन्धित निकायमा तत्काल पठाउने बताउनुभएको छ ।
यस्तो छ ज्ञापनपत्र
यो बारेमा तपाईको प्रतिकृया