२९ बैशाख, २०७६
मन्थली– रामेछापको सदरमुकाम मन्थलीलाई मुख्य कार्यक्षेत्र बनाएर काम गरिरहेको नवजागरण बचत तथा ऋण सहकारी संस्थामा बचत गर्ने बालबालिकाको संख्या बढ्न थालेको छ । २०५५ सालमा स्थापना भएको सहकारीमा हाल ७ सय १३ जना बालबालिकाहरु नियमित बचत गर्दै आइरहेका छन् ।
बालबालिकाको बचत तथा सहकारी प्रतिको अभिरुची अभिबृद्धि गर्दै सानै उमेरदेखि नियमित रुपमा बचत गर्ने संस्कारको विकास गराउने मुख्य उद्देश्यले शनिबार सहकारीले बाल बचतकर्ताहरुको लागि बाल भेला तथा बनभोज कार्यक्रमको आयोजना समेत गरेको छ ।
भेलामा प्रतिमा आलेमगरको अध्यक्षतामा ९ सदस्यीय नबजागरण बालक्लब गठन गरेको छ । त्यस्तै क्लबको सचिवमा प्रथमा श्रेष्ठ, सदस्यहरु सारिका कार्की, स्नेहा घिमिरे, प्रनिता माझी, निशान खड्का, सुरज कोइराला, निकेश पौडेल र नितेश पौडेल रहेका छन् । सहकारीको बाल कार्यक्रमहरुलाई सहज रुपमा संचालन गर्नको लागि बालक्लब गठन गरिएको सहकारीका सहायक व्यवस्थापक रामचन्द्र कार्कीले बताए ।
बाल भेला तथा बनभोज कार्यक्रममा बालबचतकर्ताहरुको उल्लेख्य सहभागीता रहेको थियो । कार्यक्रमममा विविध मनोरञ्जनात्मक कार्यक्रमका साथै नवजागरण बचतको परिचय र सहकारीमा बचतको आवश्यकता लगाएतका विषयमा जानकारी गराइएको थियो । सहकारीले हाल मन्थली लगाएत आसपासका स्थानहरुलाई कार्यक्षेत्र बनाई संचालन आफ्नो कामलाई अगाडी बढाईरहेको छ । सहकारीमा ५ हजार ६ सय ८ जना शेयर सदस्यहरु रहेको शिक्षा उपसमिति संयोजक नारायण बहादुर कार्कीले जानकारी दिए । सहकारीले हाल साँढे ३४ करोड बराबरको कारोबार गरिरहेको छ ।
यो बारेमा तपाईको प्रतिकृया