रामेछाप– जिल्लाको सदरमुकाम मन्थली बजारमा एक मासु पसलबाट किरा परेको माछा खुलेखाम रुपमा विक्री हुने गरेको खुलासा भएको छ । जिल्ला प्रशासन कार्यालय रामेछापले आइतबार बजार अनुगमनका क्रममा देवकोटा चोकमा रहेको भिमेश्वर कोल्ड स्टोरमा विक्री गर्न राखिएको अवस्थामा ३० केजी किरा परेको माछा फेला पारेको हो । कोल्ड स्टोरमा विक्री गर्न राखिएकै अवस्थामा किरा परेको माछा भेटिएकाले उपभोक्ताले यहि माछा खरिद गरेर लग्ने गरेको अनुगमन टोलीले दाबी गरेको छ ।
त्यसैगरी अनुगमनकै क्रममा विविएस हार्डवेयर पसलबाट एक सय लिटर म्याद नाघेको इनामेल र ५ बट्टा क्यास्टोल मोविल पनि फेला पारेको अनुगमन टोलीका प्रमुख सहायक प्रमुख जिल्ला अधिकारी राम प्रसाद भट्टराईले जानकारी दिनुभएको छ । त्यस्तै आइडी किराना पसलबाट अनुमति विना बिक्रीको लागि रोखेको २८ प्याकेट गुड्खा, ४ बट्टा पाइलट चुरोट, २ बट्टा सूर्य चुरोट, एक प्याकेट सडेको मिठाई समेत भेटिएको भट्टराईले बताउनुभयो । उहाँका अनुसार श्रेष्ठ भोजनालय एण्ड लजबाट पनि अनुमति विना बिक्रीको लागि राखिएको ६ बट्टा चुरोट भेटिएको छ । यसरी भेटिएका सबै सामाग्रीहरु बरामत गरिएको सहायक प्रजिअ भट्टराईले बताउनुभयो ।
व्यवसयिहरुले उपभोक्ताको स्वास्थ्यलाई ख्याल नगरी व्यवसाय संचालन गरेकाले बजार अनुगमन सँगै त्यसको अध्ययन पनि भइरहेकाले उनिहरुलाई कानून अनुसार कारबाही हुने प्रमुख जिल्ला अधिकारी लिला कुमारी केसी पाण्डेले बताउनुभयो ।
प्रजिअ केसी पाण्डेले उपभोक्तालाई सामाग्री खरिद गर्दा म्याद भएको र नभएको यकिन गरेर मात्र गर्न खरिद गर्न आग्रह गर्नुभएको छ । बजार अनुगमनका क्रममा एक पटक गल्ती गर्ने पसलको नाम सार्वजिन गर्दै जरिवाना गरिने र त्यस पछि पनि गल्ती गरेको भेटिएमा कानून अनुसार कडा कारबाही गरिने प्रजिअ केसी पाण्डेले चेतावनी दिनुभयो ।
यो बारेमा तपाईको प्रतिकृया