टेक्ने लौरोले लियो ज्यान !

१९ बैशाख, २०७६

रामेछाप– रामेछापको गोकुलगंगा गाउँपालिका–४ बेतालीमा यात्रुबहाक बसबाट खसेर एक ब्यक्तिको ज्यान गएको छ । रामेछापको प्रितिबाट मन्थली तर्फ आउँदै गरेको बा ३ ख ९६६२ नम्बरको यात्रुबहाक बसको ढोकाबाट खसेर बेताली निवासी करिब ६५ बर्षका होम प्रसाद घिमिरेको ज्यान गएको प्रहरीले बताएको छ । गोकुलगंगाका दिपक खड्काका अनुसार बुधबार बेतालीबाट ठोसे बिहे लिएर गएको उक्त बसमा घिमिरे पनि जन्त जानुभएको थियो । बसमा उहाँको लौरो छुटेकाले लौरो निकाल्नको लागि बिहिबार बिहान घिमिरे आफैले बस रोकेर लौरो झिक्न चढ्नु भएको थियो ।

बेतालीको बाहुनी मोडमा लौरो झिक्न बस चढ्नु भएका घिमिरेको बस चढेको ठाउँबाट करिब ५ मिटर पर पुगे पछि ढोकाबाट खसेर ज्यान गएको खड्काले बताउनुभयो । जिल्ला प्रहरी कार्यालय रामेछाप प्रबक्ता शेख अदालतका अनुसार बसको ढोकाबाट घिमिरे र बसका सहचाल सँगै खसेका थिए । बसबाट खसेकै ठाउँमा घिमिरेको ज्यान गएको र सहचालक सामान्य घाइते भएको प्रबक्ता अदालतले बताउनुभयो । एक हप्ता अघि मात्रै बसको ढोकाबाट खसेर रामेछापकै एक महिलाको ज्यान गएको थियो ।