रामेछाप । जिल्ला प्रहरी कार्यालय रामेछापले जिल्लाका प्रहरीहरुले गरेका कामप्रतिको गुनासो तथा सुझाब संकलन गर्ने पेटिका मन्थली नगरपालिकालाई हस्तान्तरण गरेको छ ।
रामेछाप प्रहरी प्रमुख बसन्त पाठकले मन्थली नगरपालिकाका नगर प्रमुख रमेश बस्नेतलाई प्रहरी कर्मचारीहरु सँग सम्बन्धीत गुनासो तथा सुझाब संकलन गर्न उक्त पेटिका एक कार्यक्रमका साथ आज हस्तान्तरण गर्नुभएको हो ।
बागमति प्रदेश अन्तर्गतका सबै जिल्लामा प्रहरी कार्यालयले जिल्ला सदरमुकाम रहेका पालिकामा आज एकै दिन गुनासो संकलन पेटिका हस्तान्तरण गर्ने कार्यक्रम रहेको प्रहरी प्रमुख बसन्त पाठकले बताउनुभयो ।
उहाले प्रहरीहरुलाई थाहा नभएको तर नगर क्षेत्र भित्र भैरहेको अपराधिक कृयाकलापका बारेमा र प्रहरी हरुले गरेको कामकाजका बारेमा गुनासो तथा सुझाब संकलन गरी कार्यशैलिलाई थप पारदर्शि र परिमार्जित गर्ने उद्धेश्यका साथ पेटिका हस्तान्तरण गरिएको बताउनुभयो ।
उक्त पेटिकामा परेका उजुरीहरु नियमित रुपमा प्रहरी प्रतिनिधि र नगरपालिकाका प्रतिनिधिहरुको रोहबरमा खोलेर उजुरी हाल्नेको नाम गोप्य राखि बागमति प्रदेश प्रहरी कार्यालय मकवानपुर हेटौडामा पठाइनेपनि उहाले बताउनुभयो । कार्यक्रमका अबसरमा बोल्दै नगर प्रमुख रमेश कुमार बस्नेतले यस्ता कार्यक्रमले प्रहरीहरुको कामगर्ने शैली मा फरक आउनुका साथै छिटो छरितो,चुस्त दुरुस्त ढंगबाट काम गर्न उर्जा मिल्ने बताउनु भयो ।
यो बारेमा तपाईको प्रतिकृया