११ असार, २०७६
मन्थली- नेपाल विद्यालर्थी संघ मन्थली शहिद स्मृति बहुमुखी क्याम्पस इकाईले स्नातक तहको मानविकी संकायमा अध्ययनरत विद्यार्थीहरुलाई प्रयोगात्मक शुल्क बढी निर्धारण गरेको भन्दै शुल्क घटाउन माग गर्दै क्याम्पस प्रशासनलाई ध्यानाकर्षणपत्र बुझाएको छ ।
विद्यार्थी संगठनका केही विद्यार्थीहरूलाई मात्रै राखेर शुल्क तोकिएको र अहिले निर्धारण गरिएको शुल्कले विद्यार्थीलाई आर्थिक भार पर्ने भन्दै बिहिबार इकाई अध्यक्ष सन्तोष सुवेदीको नेतृत्वमा गएको विद्यार्थीहरुको टोलीले तत्काल निर्णय सच्याउन माग गर्दै ध्यानाकर्षणपत्र बुझाएको हो ।
ध्यानाकर्षणपत्र बुझाएको मितिले तीन दिन भित्र विद्यार्थीहरुको ढाड सेक्ने गरी निर्धारण गरिएको शुल्क तत्काल नसच्याए नेविसंघ क्याम्पस इकाई लगायत विभिन्न विद्यार्थी संगठनहरु चरणबद्ध आन्दोलनमा जान बाध्य हुने समेत नेविसंघले ध्यानकर्षणपत्रमा उल्लेख गरेको छ ।
अहिले निर्धारण गरिएको शुल्क स्नातक प्रथम वर्षका विद्यार्थीलाई एक हजार पाँच सय, दोस्रो वर्षका विद्यार्थीलाई तीन हजार र तेस्रो वर्षका विद्यार्थीहरूलाई चार हजार रहेको छ । निर्धारण गरिएको शुल्कमा भ्रमणको लागि सबै तहका विद्यार्थीलाई थप एक हजार पनि तिर्नु पर्ने हुन्छ । ध्यानाकर्षणपत्र बुझ्दै क्याम्पस प्रमुख ऋषी कुमार कार्कीले सबै विद्यार्थी संगठ र स्ववियुका पदाधिकारी सहितलाई बोलाएर छलफल गर्ने बताउनुभयो ।
ध्यानाकर्षणपत्र बुझाउन नेविसंघ मन्थली शहिद स्मृति बहुमुखी क्याम्पस इकाईका पदाधिकारी, नेविसंघ रामेछापका सचिब र कोषाध्यक्षको समेत सहभागिता रहेको थियो ।
यो बारेमा तपाईको प्रतिकृया