मन्थली,११ चैत । माध्यामिक शिक्षा परीक्षा–२०८२ -एस.ई.ई) का लागि केन्द्राध्यक्ष अभिमुखीकरण कार्यक्रम मन्थलीमा आज सम्पन्न भएको छ ।
शिक्षा विकास तथा समन्वय इकाई रामेछापको आयोजनामा सम्पन्न उक्त अभिमुखीकरण कार्यक्रममा परीक्षा सञ्चालन सम्बन्धि नीति निर्देशन र मार्गदर्शनका बारेमा जानकारी गराइएको थियो ।
जिल्ला परीक्षा समन्वय समितिका संयोजक एबं प्रमुख जिल्ला अधिकारी श्याम कृष्ण थापाको अध्यक्षतामा सम्पन्न उक्त कार्यक्रमका अवसरमा इकाई प्रमुख नेत्र प्रसाद गजुरेलले परीक्षा सञ्चालन सम्बन्धि जानकारी गराउनुभएको थियो भने प्रजिअ थापाले शान्ति र मर्यादित तवरबाट परीक्षा सञ्चालन गर्ने विधिका बारेमा जानकारी गराउँनुभयो ।
सो अबसरमा प्रहरी नायव उपरीक्षक भोला भट्टले परीक्षाको सुरक्षा रणनीतिका बारेमा जानकारी गराउनुु भएको थियो ।
यही चैत्र १९ गते बाट सञ्चालन हुने उक्त माध्यामिक शिक्षा परीक्षा -एस.ई.ई.) जिल्लाभर बाट १ सय ५५ जना प्राबिधिक धारका र २ सय १ जना ग्रेड बृद्धि सहित कुल २ हजार ४ सय एक सठ्ठी जना परीक्षार्थीहरुले जिल्लाका १४ वटा परीक्षाकेन्द्रबाट परीक्षा दिने तयारी भैरहेको शिक्षा विकास तथा समन्वय इकाई रामेछापका प्रमुख नेत्र प्रसाद गजुरेलले बताउनुभयो ।
यस जिल्लामा विक्रम सम्बत २०८० साल सम्म २४ वटा केन्द्र भएपनि परीक्षार्थीको संख्या घट्दै गएपछि २०८१ सालमा ५ वटा केन्द्र घटेर १९ वटा कायम भएको थियो भने यस वर्ष २०८२ मा पनि ५ वटा केन्द्र घटेर १४ वटा कायम भएको शिक्षा विकास तथा समन्वय इकाई रामेछापका सूचना अधिकारी दिनेश नेपालीले बताउनुभयो ।
यो बारेमा तपाईको प्रतिकृया