.रामेछाप,२ चैत । यहि चैत्र ५ गते हुन लागेको स्वतन्त्र विद्यार्थी युनियनको निर्वाचनका लागि मन्थली सहिद स्मृति बहुमुखी क्याम्पसको संयुक्त विद्यार्थी समुहको प्यानलले आफ्नो समुहको तर्फबाट १४ बँुदे प्रतिबद्धता पत्र सार्वजनिक गरेको छ ।
बिहिवार मन्थलीमा पत्रकार सम्मेलनको आयोजना गरी सो समूहले प्रतिबद्धता सार्वजनिक गरेको हो ।
प्रतिबद्धता पत्र स्ववियु सभापतिका उम्मेदवार अबिनास कार्कीले सार्वजनिक गरेका थिए । प्रतिबद्धता सार्वजनिक गर्दै उनले कलेजको विसंगति र विकृतिका विरुद्ध आफनो प्यानलको उमेद्वारी भएकाले त्यसका लागि सबैलाई साथ दिन आग्रह गरे । उनले भने –“यस अघिको स्ववियुले क्याम्पसको शैक्षिक सुधारका लागि खासै काम गर्न नसकेको र सोहि विसंगतिको निदान र विधिको शासन स्थापित गराउन आफ्नो प्यानल निर्वाचनमा होमिएको बताए ।”
उनले आफुहरु निर्वाचित भए क्याम्पको शैक्षिक क्षेत्रमा पनि आमुल परिवर्तन गदै क्याम्पसको शुसासन देखि शैक्षिक परिवर्तनका मुद्धाहरुमा लड्ने प्रतिबद्धता ब्यक्त गरे । त्यसका लागि आफ्नो प्यानललाई निर्वाचित गराउन पनि सबैलाई आग्रह गरे । उनले आफु र आफ्नो प्यानल विजयी भए क्याम्पस सँग सहकार्य गर्दै आम विद्यार्थीको हक, हित र अधिकार सुनिश्चितका लागि काम गर्ने प्रतिबद्धता गरे ।
प्रतिबद्धता पत्रमा क्याम्पसको पठन पाठनमा सुधार गर्दै आधुनिक र प्रविधियुक्त कक्षा कोठा निर्माण देखि जेहेन्दार,दलित,गरिब र असहाय विद्यार्थीहरुका लागि छात्रवृत्तिको व्यवस्था मिलाउने सम्मको कुरा उल्लेख गरिएको छ ।
उक्त प्रतिबद्धता पत्रमा क्याम्पसमा संकाय अनुसार पुस्तकालय,स्वच्छ खानेपानी, सरसफाइ युक्त शौचालय र ब्यवस्थित चमेनागृहको व्यवस्था गरिने कुरा समेत उल्लेख गरिएको छ ।
कुल ७ सय १४ जना विद्यार्थी मतदाता रहेको उक्त क्याम्पसमा हुन लागेको निर्वाचनलाई निश्पक्ष र शान्तिपुर्ण तरिकाले सम्पन्न गर्ने अभियानमा संचार माध्यम लगायत आम सरोकारवालालाई साथ दिन पनि संयुक्त प्यानलले आग्रह गरेको छ ।
स्ववियु निर्वाचनका लागि नेविसंघ,अखिल क्रान्तिकारी र अनेरास्ववियू विचको गठबन्धन गरी संयुक्त विद्यार्थी प्यानल बनाएर विद्यार्थीहरु चुनाबी मैदानमा होमिएका छन् ।
निर्वाचनमा सयुक्त प्यानलले आफ्ना सबै चुनावी कार्यक्रमहरु पनि सार्वजनिक गरेको छ । निर्वाचनमा यस प्यानल सँग एमाले निकट अनेरास्ववियुको प्यानल बिच प्रतिस्पर्धा हुने भएको छ ।
पत्रकार सम्मेलनमा सभापति लगायतका सवै उमेद्वारहरु तथा विद्यार्थी संगठनहरुका अध्यक्ष,जिल्ला पदाधिकारी,नेका र माओवादी केन्द्रका पार्टिका जिल्ला नेता सहितको उपस्थितिमा भएको पत्रकार सम्मेलनमा सहभागि नेताहरुले लोकतन्त्रको रक्षाका लागि बनेको गठबन्धनका साझा उमेद्वार हरुलाई जिताउन विद्यार्थी हरुलाई आग्रह गरेका थिए ।
पत्रकार सम्मेलनमा नेपाली काँग्रेसका नेता दिपेन्द्र खड्का,माओवादी केन्द्रका नेता शिशिर खड्गी,नेविसंघका जिल्ला अध्यक्ष विनोद बुढाथोकी,अखिल क्रान्तिकारीका जिल्ला अध्यक्ष केशब बस्नेत लगायतका नेता कार्यकर्ताहरु समेतको उपस्थिति रहेको थियो ।
यो बारेमा तपाईको प्रतिकृया