मन्थली,११ जेठ । बागमती प्रदेश प्रहरी प्रमुख,प्रहरी नायव महानिरीक्षक (डी.आइ.जी.पी.) किरण राणाले प्रहरीको काम सवारी साधनसँग जरिवाना लिएर राजस्व सङ्कलन गर्ने मात्र नभएको बताउनु भएको छ ।
सो कुरा उहाँले विहिवार रामेछापको मन्थलीमा जिल्ला प्रहरी कार्यालय रामेछापले आयोजना गरेको एक अन्तरक्रिया कार्यक्रमका अवसरमा बताउनु भएको हो ।
उहाँले मापदण्ड विपरीत चलेका सबै सवारी साधन लाई कानुनी दायरामा ल्याउने भन्दै चालकको एक÷दुई पटकको गल्तीमा जरिवाना नगरी सम्झाएर पठाउन ट्राफिक प्रहरीहरूलाई अनुरोध गर्नुभयो ।
प्रमुख राणाले प्रहरीहरूको काम राजस्व सङ्कलन मात्र नभएर शान्ति सुरक्षा, सवारी व्यवस्थापन, विभिन्न घटनाहरुको अनुसन्धान गर्ने समेत रहेको बताउनुभयो । उहाँले जबरजस्ती करणी र आत्महत्यामा बागमती प्रदेश दोस्रो स्थानमा रहेकोले यस्ता घटनाहरुलाई कम गर्ने खालका कार्यक्रमहरू बागमती प्रदेशका सबै जिल्लामा ल्याइने बताउनुभयो ।
दुर्घटना न्यूनीकरण गर्न सिन्धुली र काभ्रेको राजमार्गमा माथिल्लो निकाय बाटै टाइम कार्ड लागु गरिएको भए पनि “यो टाइम कर्ड व्यावसायिक उपार्जनका लागि लागु गरेको जस्तो भएको” भनेर नागरिकहरूले गुनासो गरिरहेको हुँदा यसलाई थप व्यवस्थित गर्ने बताउनुभयो ।
कार्यक्रमका अवसरमा बोल्दै मन्थली नगर प्रमुख लव श्रेष्ठले मन्थली नगरपालिकाको वडा नं ८ र ९ तथा ११ र १२ को बिचमा प्रहरी विट थप्नु पर्ने, आर्थिक चपेटामा परेर आत्महत्या गर्नेको सङ्ख्या बढ्दै गएकोले त्यसको न्यूनीकरणका कार्यक्रमहरू ल्याउनु पर्ने र मन्थली बाट काठमाडौँ जाँदा बाटोमा लागु गरिएको टाइम कार्डले नागरिकहरूको सुरक्षा भन्दा हैरानी खेप्नु परेको साथै १२५ किमी सडक पार गर्न ५÷६ घण्टा बिताउनुपर्ने भएकोले यसको व्यवस्थापन गर्न अनुरोध गर्नुभयो ।
प्रहरीहरूले गरेको सकारात्मक र नकारात्मक कामका वारेमा सुझाव सङ्कलन गर्ने उद्देश्यले गरिएको अन्तरक्रियात्मक कार्यक्रममा लिखु खोलामा दुगर्ड ग्रुप द्वारा सञ्चालित हाइड्रो पावर कम्पनीले मापदण्ड विपरीत काम गर्दा स्थानीय नागरिकहरूले सास्ती भोग्नु परेको, जिल्लाको ट्राफिक व्यवस्थापनमा समस्या रहेको र प्रहरीले घटना घट्ने बित्तिकै उजुरी लिन आनाकानी गर्ने गरेको बारेमा नागरिक समाजका अगुवाहरूले प्रदेश प्रहरी प्रमुखको ध्यानाकर्षण गराएका थिए ।
कार्यक्रम जिल्ला प्रहरी कार्यालय रामेछापका प्रहरी नायव उपरीक्षक होम बहादुर पराजुलीको अध्यक्षता तथा मन्थली नगर प्रमुख लव श्रेष्ठको प्रमुख आतिथ्यतामा भएको थियो ।
यो बारेमा तपाईको प्रतिकृया