मन्थली,८ असार । श्री रुद्राक्षेश्वर माध्यमिक विद्यालय मुगिटारले शुक्रवार एक कार्यक्रमको आयोजना गरी विद्यालयको प्रथम स्मारिका विमोचन गरेको छ ।
विद्यालय व्यवस्थापन समितिका अध्यक्ष दीपक राज प्रसाईको अध्यक्षतामा सम्पन्न उक्त कार्यक्रमको उद्घाटन र स्मारिकाको विमोचन बागमती प्रदेश सांसद आनन्द कुमार श्रेष्ठले गर्नु भएको थियो ।
कार्यक्रमका अवसरमा पत्रकार रमेश ढुङ्गेलले सो विद्यालयमा आफ्नी स्व आमा शान्ता कुमारी ढुङ्गेको नाममा १ लाख ११ हजार १ सय एघार रुपैयाँको अक्षय कोष स्थापना गर्ने घोषणा गर्नु भएको छ भने समाजसेवी सङ्गीता कडरियाले आफ्नी मावलीकी हजुरआमा मैयाँदेवी प्रसाईँको नाममा रु २ लाखको र पूर्व विद्यार्थी कुवेर दाहालले आफ्नो स्व बुवा एवं सोही विद्यालयका पूर्व प्र अ यादव प्रसाद दाहालको नाममा रु १ लाख ११ हजार १ सय एघार रुपैयाँको अक्षय कोष स्थापनाका लागि नगदै हस्तान्तरण गर्नु भएको थियो । कार्यक्रमका अवसरमा बोल्ने अधिकांस वक्ताहरूले विद्यालयको शैक्षिक सुधार गर्नु पर्ने कुरालाई जोड दिएका थिए ।
कार्यक्रमका अवसरमा बोल्दै प्रमुख अतिथि एवं प्रदेश सांसद श्रेष्ठले अधिकांश सामुदायिक विद्यालयहरूको शैक्षिक गुणस्तर खस्कँदै गइरहेकोले गुणस्तरीय पठन पाठनका लागि शिक्षक, विद्यार्थी र अभिभावक तीनै पक्ष मिल्नु पर्ने कुरालाई जोड दिनुभयो । त्यसै गरी मन्थली नगरपालिकाका प्रमुख लव श्रेष्ठ ले नगरले अहिले शैक्षिक सुधार अन्तर्गत जुन तहको विद्यालय छ त्यही तहको शिक्षकलाई प्र.अ बनाउने गरी मापदण्ड बनाएर कार्यान्वयनमा ल्याउन लागेको भन्दै अब माध्यमिक विद्यालयहरूमा प्रावि र निमाविका शिक्षकहरू प्र.अ हुन नपाउने बताउनुभयो ।
कार्यक्रमका अवसरमा वडा नं–७ का वडा अध्यक्ष भुवन हरि प्रसाईँ, ८ का वडा अध्यक्ष गोपाल श्रेष्ठ,पूर्व प्र अ पवनराज दाहाल, पत्रकार महासङ्घ बागमती प्रदेश कोषाध्यक्ष रमेश ढुङ्गेल,स्थानीय पाण्डव प्रसाईँ,विद्यालय व्यवस्थापन समितिका निवर्तमान अध्यक्ष श्री बहादुर माझी, पिटिएका अध्यक्ष छत्र मुंग्राती, स्थानीय शिक्षक मोतीलाल लामा लगाएतले आ–आफ्नो मन्तब्य राखेका थिए ।
२०१४ सालमा स्थापना भएको यस विद्यालयमा अध्यापन गराउने पूर्व प्रधानाध्यापकहरु क्रमश सिद्धिराज श्रेष्ठ, नारायण प्रसाद उप्रेती, रामचन्द्र शर्मा कँडेल, यादव दाहाल , भुवन हरि प्रसाईँ , कृष्ण प्रसाद ढुङ्गेल,पवनराज दाहाल, लगाएत लाई विद्यालयले सम्मान गरेको छ । त्यसै गरी विद्यालय स्थापना कालदेखि हाल सम्म बढी चन्दा दिने एवं व्यवस्थापन समितिमा रहेर काम गर्ने करिब ६५ शिक्षाप्रेमीहरुलाई पनि सम्मान गरिएको थियो ।
कार्यक्रमका अवसरमा सो विद्यालयमा अध्ययनरत विद्यार्थीहरूले विभिन्न सांस्कृतिक कार्यक्रमहरू प्रदर्शन समेत प्रदर्शन गरेका थिए ।
यो बारेमा तपाईको प्रतिकृया