रामेछाप । नेपाल रेडक्रस सोसाइटी जिल्लाशाखा रामेछापले जिल्लामा पहिलो पटक पुर्व अस्पताल सहितको अत्याधुनिक एम्बुलेन्स सेवा संचालन गर्ने भएको छ । केन्द्रिय कार्यालयले रामेछाप रेडक्रसका लागि पुर्व अस्पताल सुविधा सहितको एम्बुलेन्स उपलब्ध गराएपछि जिल्लाले उक्त सेवा सहितको एम्बुलेन्स सेवा संचालन गर्न लागेको हो । उक्त एम्बुलेन्स भित्र एक जना स्वास्थकर्मि विरामीका लागि आबश्यक औषधि र अक्सिजन सिलिण्डर उपलब्ध गराईने छ ।
अमेरिकन रेडक्रसको सहयोगमा केन्द्रिय कार्यालयले ३ दिन अघि रामेछाप,दोलखा,ओखलढुङ्गा, चितवन र मकवानपुर गरि ५ वटा जिल्लाका लागि ख वर्गको एम्बुलेन्स हस्तान्तरण गरेको थियो । जिल्लाले पनि तत्काल प्राप्त बैठक बसि निश्चित मापदण्डको आधारमा एम्बुलेन्स सेवा संचालन गर्न लागेको रेडक्रस रामेछापका मन्त्री जय प्रकाश श्रेष्ठले जानकारी गराए ।
केन्द्रीय कार्यालयले आयोजना गरेको एम्बुलेन्स हस्तान्तरण कार्यक्रममा स्वास्थ्य तथा जनसंख्या मन्त्रालयका सह प्रवक्ता डा.समीरकुमार अधिकारी, नेपाल रेडक्रस सोसाइटीका कार्यकारी निर्देशक उमेशप्रसाद ढकाल, रेडक्रसको अन्तर्राष्ट्रिय महासंघ नेपाल प्रमुख अजमद उल्ला र अमेरिकन रेडक्रसका नेपाल प्रमुख हरि कार्कीले संयुक्त रूपमा जिल्ला शाखा तथा उपशाखाका प्रतिनिधिहरूलाई एम्बुलेन्सको साँचो हस्तान्तरण गरेका थिए ।
नेपाल रेडक्रस सोसाइटीका कार्यकारी निर्देशक उमेशप्रसाद ढकालले नेपाल रेडक्रस सोसाइटीले ७० जिल्लामा दुई सयभन्दा बढी एम्बुलेन्स सञ्चालन गरी सेवा दिइरहेको बताउनुभयो ।
यो बारेमा तपाईको प्रतिकृया