रामेछाप २९ असोज । रामेछापको सदरमुकाम मन्थलीमा सामुदायिक आँखा केन्द्र भवनको शिलान्यास गरिएको छ । करिब २ करोड ५० लाख रुपैयाँको लागतमा निर्माण गर्न लागिएको उक्त भवनको शिलान्यास सोमबार मन्थली नगरपालिकाका प्रमुख लव श्रेष्ठले गर्नु भएको हो । सो अवसरमा प्रमुख श्रेष्ठले सदरमुकाममा बन्न लागेको सामुदायिक आँखा केन्द्रको नयाँ भवन सर्व साधारणका लागि वरदान साबित हुने भन्दै त्यसका लागि मन्थली नगरपालिकाले पनि सकेको सहयोग गर्ने बताउनु भयो ।
सर्व साधारणको हितलाई ध्यानमा राखी तीलगंगा आँखा केन्दले लामो समय देखि जिल्लाको अग्रणी गैर सरकारी संस्था तामाकोसी सेवा समितिको संरक्षणमा संस्था भित्र सामुदायिक आँखा केन्द्र सञ्चालन गरी सर्व साधारणलाई गुणस्तरीय सेवा दिँदै आएको छ । भवन निर्माण प्रयोजनका लागि तामाकोसी सेवा समितिले ९ आना जग्गा निःशुल्क रूपमा उपलब्ध गराएको तामाकोसी अस्पताल मन्थलीका अध्यक्ष गोविन्द घिमिरेले जानकारी दिनु भयो ।
उहाँका अनुसार भवन निर्माणको लागि लाग्ने अनुमानित रकम तीलगंगा आँखा केन्द्र,भिजन हिमालय फाउन्डेसनका प्रमुख दातृ डाक्टर रोमन ले करिब १ करोड रुपैयाँ र बाँकी रकमको हकमा रामेछाप सामुदायिक आँखा केन्द्र मन्थलीले संयुक्त रूपमा सहयोग गर्ने भएका छन् । भवन निर्माणको काम आगामी ५ वर्ष भित्रमा सक्ने गरी सम्झौता भएको भए पनि निर्माणको कामले २ वर्ष भित्रमा पूर्णता पाउने गरी काम गरिने पनि अध्यक्ष घिमिरेले बताउनु भयो । २ तलाको भवन सञ्चालनमा आएपछि आँखाको नियमित परीक्षण सँगै विज्ञ चिकित्सक मार्फत अप्रेसनको काम पनि मन्थलीमै हुने जानकारी तामाकोसी अस्पतालका निर्देशक डा सुमन कर्माचार्यले जानकारी दिनु भयो ।
यो बारेमा तपाईको प्रतिकृया