रामेछाप १६ मङ्सिर । कृषकहरूको गुजारामुखी प्रणालीबाट व्यवसायीकरण तर्फ रूपान्तरण गराउने मुख्य उद्देश्यका साथ २०६७ सालमा स्थापना भएको आधुनिक कृषि सहकारी संस्थाको १३ औँ वार्षिक साधारण सभा शनिवार सदरमुकाम मन्थलीमा सकिएको छ । आरम्भमा २७ जना सदस्यहरूबाट कार्य आरम्भ गरेको उक्त संस्थाले कृषकहरूलाई सङ्गठित गर्दे पशुपालन, अन्न,तरकारी र फलफूल उत्पादक किसानहरूलाई ब्यवसयीक बनाउँदै अघि बढ्ने उद्देश्यले गठन गरिएको उक्त संस्थामा हाल ६ सय ५ जना शेयर सदस्य रहेको पनि सो अवसरमा जानकारी गराइएको थियो ।
साधारण सभामा विशेष अतिथिको रूपमा बोल्नु हुँदै जिल्ला समन्वय समिति रामेछापका उप – प्रमुख प्रेम बहादुर थापाले आधुनिक कृषि सहकारी संस्थाले सदरमुकाममा दुग्ध उत्पादनको क्षेत्रमा पुर्याएको योगदानको चर्चा गर्दै सहकारीको संस्थागत विकाशका लागि आफू जस्तोसुकै सहयोग गर्न पनि तयार रहेको बताउनु भयो ।
उक्त कार्यक्रममा नेपाल पत्रकार महासङ्घ रामेछापका अध्यक्ष बद्री नयाँघरेले आधुनिक कृषि सहकारी संस्थाकै अगुवाइ र भिजनकै कारण मन्थली दूध उत्पादनको क्षेत्रमा आत्म निर्भर भएको भए पनि राज्यको अपरिपक्व नीतिका कारण कृषक र दूध डेरी दुवै समस्यामा रहेको बताउनु भयो । कार्यक्रममा मन्थली नगर पालिकाका सहकारी शाखाका प्रमुख उज्ज्वल पोखरेलले कृषिको उत्पादन देखि बजारीकरण सम्मका समस्या समाधानको रोग सीमित बजेट नै मुख्य कारक रहेको बताउनु भयो । त्यसका लागि बजेटको उचित व्यवस्थापन गरी राजनीतिक दल अगुवा कृषक र अन्य सरोकारवालाहरू समेतको रोहवरमा समस्याको गहिराइमा पुग्न सके कृषि क्षेत्रमा परिवर्तन सम्भव रहने बताउनु भयो ।
सो अवसरमा अगुवा कृषक होतराज ढकालले कृषकहरूलाई राज्यले हेर्ने दृष्टिकोण नै खराब रहेको भन्दै सर्व प्रथम नीतिगत रूपमै कृषकहरूलाई राज्य र समाजले हेर्ने दृष्टिकोणमा परिवर्तन जरुरी रहेको बताउनु भयो । उहाँले पछिल्लो समयमा राज्यका कारण कृषकहरूले सबै खाले नाकाबन्दीको सामना गर्नु परेको गुनासो गर्दे उत्पादन देखि बजारीकरण सम्म देखिएका समस्याका बारेमा पनि चर्चा गर्नु भयो । अरू त परै जावोस गाई र कुखुरा पालक कृषकको दाना ढुवानीमा पनि राज्य पक्ष नै बाधक भएको अवस्थामा कृषकहरूले काम गर्ने वातावरण कसरी बन्न सक्छ भन्दै कृषक ढकालले राज्य समक्ष प्रति प्रश्न गर्नु भयो । उहाँले आफूहरूले राज्य,गैसस र सञ्चार क्षेत्र वाट समेत उपेक्षित हुनु परेको गुनासो पनि गर्नु भयो ।
अगुवा तथा ज्येष्ठ कृषक विष्णु सुवेदीको अध्यक्षतामा भएको उक्त साधारण सभामा संस्थाका अध्यक्ष भानुभक्त श्रेष्ठले सचिव र कोषाध्यक्षका प्रतिवेदन पेस गर्नु हुँदै यस वर्ष सहकारीले आफ्ना शेयर सदस्यहरूका लागि १० प्रतिशत मुनाफा वितरण गर्न लागेको जानकारी पनि दिनुभयो । साधारण सभाका अवसरमा संस्थाको शेयर रकम ४८ लाख २ हजार ५ सय रुपैयाँ,कुल बचत रकम ३७ लाख ४८ हजार ९८ रुपैयाँ र विभिन्न कोषहरूमा गरी ५लाख ७४ हजार ६ सय ३८ रुपैयाँ रकम रहेको पनि जानकारी गराइएको थियो । सो अवसरमा संस्थाले आगामी २०गते जन्म स्थान रामेछाप नगरपालिका वडा नं १ को गोठ गाउँमा पनि साधारण सभा गरी समितिको नयाँ नेतृत्व चयन गर्ने कार्यक्रम रहेको जानकारी पनि सो अवसरमा गराइएको थियो ।
यो बारेमा तपाईको प्रतिकृया