रामेछाप, १६ चैत । रामेछापको रामेछाप नगरपालिका वडा नं –६ ओख्रेनीमा मिनी कोल्ड स्टोर निर्माण गरिएको छ ।
ओख्रेनीका जुनार कृषकलाई लक्षित गरी मिनी कोल्ड स्टोर निर्माण गरिएको हो । प्रधानमन्त्री कृषि आधुनिकीकरण परियोजना परियोजना कार्यान्वयन एकाइ रामेछापको जुनार जोन कार्यक्रम अन्तरगत १० लाख अनुदान र स्थानीय कृषक जागरण कृषि सहकारी संस्था लिमिटेडको ३ लाख ४० हजार गरी १३ लाख ४० हजार रुपैयाँको लागतमा उक्त स्टोर निर्माण गरिएको हो ।
उक्त मिनी कोल्ड स्टोर(कोल्ड च्याम्बर) निर्माणको लागतको शुक्रवार सार्वजनिक सुनुवाइ सहित उद्घाटन गरिएको छ । रामेछाप नगरपालिका प्रमुख लव श्री न्यौपानेले उक्त मिनी कोल्ड स्टोरको उद्घाटन गर्नुभएको हो ।
कोल्ड स्टोर उद्घाटन गर्दै नगरप्रमुख न्यौपानेले रामेछापलाई जुनारको जिल्लाका रूपमा परिचित बनाउन ठुलो योगदान गर्ने ओख्रेनीका जुनार कृषकका लागि कोल्ड स्टोर निर्माण हुनु धेरै खुसीको कुरा भएको बताउनुभयो । उहाले कोल्ड स्टोरको अभावमा बजार नपाउने डरले सस्तो मूल्यमा जुनार बेचिरहेका किसानहरूलाई यसले राहत पुग्ने बताउनुभयो ।
नव निर्मित कोल्ड स्टोरको दिगो रूपमा सञ्चालन तथा व्यवस्थापनका लागि स्थानीय सरकारले सहयोग गर्ने उहाँले बताउनुभयो । उहाँले कोल्ड स्टोरमा लाग्ने विद्युत् शुल्कलाई सहुलियतपूर्ण बनाउनका लागि स्थानीय सरकार लागिपर्ने बताउनुभयो । रामेछाप नगरपालिकाका प्रमुख प्रशासकीय अधिकृत मित्र प्रसाद घिमिरेले कोल्ड स्टोर बनेसँगै साउन भदौमै सस्तो मूल्यमा जुनार बेच्नुपर्ने किसानको बाध्यता अन्त्य हुने बताउनुभयो । अब ओख्रेनीमा उत्पादन भएको जुनारको ब्रान्डिङ प्याकेजीङ र लेव गरी मूल्य निर्धारण गर्न आवश्यक रहेको उहाँले बताउनुभायो । उहाले भन्नुभयो ओख्रेनीका जुनार बिक्रीका लागि नगरपालिकाले बजार खोजिदिने भएकोले सके सम्म धेरै जुनार उत्पादन गर्न किसानहरुलाई अनुरोध गर्नु भयो ।
कार्यक्रमका अवसरमा बोल्दै प्रधानमन्त्री कृषि आधुनिकिकरण परियोजना कार्यन्वयन इकाई रामेछापका प्रमुख थिरलाल गैरेले रामेछापको जुनारलाई वर्ष भरिनै बजारमा ब्रान्ड कायम गर्न सुरक्षित भण्डारका लागि मिनी कोल्ड स्टोर(कोल्ड च्यामबर) निर्माण बताउनुभयो । किसानको माग अनुसार आधुनिक मिनी कोल्ड स्टोर निर्माण गरी ओख्रेनीका किसानले उत्पादन गरेको जुनारलाई बेमौसममा समेत बजार पु¥याइने उहाँको भनाइ छ ।
प्रमुख गैरेले नव निर्मित मिनी कोल्ड स्टोरको ६ मेट्रिक टन फलफूल तथा तरकारी जन्य उत्पादन भण्डारण गर्ने क्षमता रहेको बताउनुभयो । सिजनमा यो कोल्ड स्टोरमा भण्डार गरेको जुनार बेमौसम ६० प्रतिशतसम्म मूल्य वृद्धिमा बिक्री गर्न सकिने उहाँको भनाइ छ । किसानको माग अनुसार रामेछाप नगरपालिका–६ ओख्रेनीका विभिन्न स्थानमा अझै थप तीन वटा कोल्ड स्टोर निर्माण हुने उहाँले बताउनुभयो । रामेछाप नगरपालिकाको १२ लाख र परियोजना कार्यान्वयन एकाइ रामेछापको १० लाख साझेदारी सहित २५ लाख लागतको १२ मेट्रिक टन क्षमता भएको र परियोजनाको ७ लाख ५० हजार अनुदानमा १० लाख २० हजार लागतका दुई वटा ६ मेट्रिक टन क्षमताको दुई वटा कोल्ड स्टोर पनि यो वर्ष नै आख्रेनीमा निर्माण हुने उहाँले बताउनुभयो ।
रामेछापको रामेछाप नगरपालिका–६ ओख्रेनीका वडा अध्यक्ष राजेश तामाङले रामेछापको जुनार उत्पादनको अव ओख्रेनीका जुनार कृषकको माग अनुसार मिनी कोल्ड स्टोर निर्माण हुनु राम्रो कुरा भएको बताउनुभयो ।
उक्त कार्यक्रमको अबसरमा बोल्दै अध्यक्ष तामाङले यसले ओख्रेनीका जुनार उत्पादक किसानको जुनारबाट हुने आम्दानी बढाउन सहयोग पुग्ने बताउनुभयो । कृषक जागरण कृषि सहकारी संस्था लिमिटेडका व्यवस्थापक पदम बहादुर तामाङले ओख्रेनीका ३० घर परिवार जुनार उत्पादक कृषक लाभान्वित हुने गरी कोल्ड स्टोर निर्माण गरिएको बताउनुभयो । कोल्ड स्टोर बनेसँगै अब ओख्रेनीका किसानले उत्पादन गरेको जुनार बेमौसममा पनि सहज रूपमा बजारमा पुग्ने उहाँको भनाइ थियो । जुनार उत्पादन हुने मौसम कार्तिक मङ्सिर महिनामा बढीमा ५० रुपैयाँ किलोमा बेच्न बाध्य यहाँका कृषकलाई अब कोल्ड स्टोरमा राखेर चैत वैशाखमा प्रति केजी १५० रुपैयाँसम्ममा बिक्री गर्न सक्ने उहाँको भनाइ छ ।
यो बारेमा तपाईको प्रतिकृया