मन्थली नगरले मेयरकप हटाएर नगरकप बनायो

रामेछाप फागुन ४ । मन्थली नगरपालिकाले बर्षेनी संचालन गर्दे आएको ‘मेयर कप’ नाम परिबर्तन गरि नगरकप बनाउने भएको छ । नगर खेलकुद समितिको बैठकले आगामि फागुन ७ गते आइतवार देखि सदरमुकाम मन्थलीमा ‘प्रथम नगर कप पुरुष भलिबल’ प्रतियोगिता संचालन गर्न लागेको हो ।
नगरपालिकाले उक्त प्रतियोगिताका लागि आवश्यक सबै तयारी गरिरहेको छ । मन्थली नगर खेलकुद समितिको आयोजनमा संचालन हुन लागेको ‘मेयर कप’ उच्चारण गर्दा ब्यक्तिको भक्ति गरेजस्तो हुने र ‘नगर कप’ नामाकरण गर्दा नगरमैत्रीको अुनुभुति हुने भन्दै नगरकप नामाकरण गरिएको नगर प्रमुख लब श्रेष्ठले बताउनु भयो ।
सिङ्गो नगरको प्रतिष्ठा संग जोडिएको ‘नगर कप’ भन्ने शब्द नगरमैत्री र लोकतान्त्रीक रहेकोले नगर खेलकुद विकास समितिको बैठकले ‘मेयर कप’ ठाउँमा ‘नगर कप’ राम्रो भन्ने निष्कर्ष निकाल्दै ‘नगर कप’ बनाएको नगरपालिकाका सूचना अधिकारी हेमन्त बुढाथोकीले बताउनु भयो । जिल्ला समन्वय समितिको मैदानमा खेलाइने उक्त प्रतियोगिताका लागि सबै वडा कार्यालयहरुलाई शुक्रवार दिउँसो १ बजे सम्म खेलाडीहरूको नामावली पठाउन नगर खेलकुद विकास समितिले निर्देशन समेत दिएको छ ।
नगरभित्रका १४ वटा वडा बाट १–१ टिम गरी कूल १४ टिमको सहभागिता रहने नगर कप पुरुष भलिबल’ प्रतियोगितामा भाग लिने खेलाडीहरू अनिबार्य रुपमा संबन्धित वडाको नागरिक हुनु पर्ने ब्यवस्था गरिएको छ । प्रतियोगितामा सिल्ड सहित प्रथम हुनेले नगद १ लाख ट्रफि र प्रमाणपत्र, द्वितीय हुनेले ७५ हजार ट्रफि र प्रमाणपत्र र तृतीयहुनेले ५० हजार तथा सान्त्वना हुनेले नगद ३० हजार सहित प्रमाणपत्र पाउने पनि सूचना अधिकारी बुढाथोकीले बताउनु भयो ।