रामेछाप ३० भदौ । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)का केन्द्रीय समितिका उपाध्यक्ष गोविन्द गिरीले शैक्षिक परिवर्तनको अभियानमा लागेको अनेरास्ववियुले आईन्दा विद्यालय, विश्वविद्यालय बन्द गर्दैनौँ, टायर नबाल्ने दाबी गर्नु भएको छ । उक्त दाबी उहाँले रामेछापको १३ औँ जिल्ला अधिवेशन तथा प्रथम अखिल महोत्सव शुक्रवारबाट सदरमुकाम मन्थलीमा उद्घाटन गर्ने क्रममा गर्नु भएको हो ।
यदि सरकारले आवश्यक वातावरण बनाइदिन्छ भने नेपालका विद्यार्थीले विश्वको जुनसुकै विश्वविद्यालयमा पनि पढ्ने र प्रतिस्पर्धा गर्न सक्छन् भन्दै उहाँले तर सरकारको अर्कमण्डताका कारण देशको शैक्षिक अवस्था तहस नहस भएको आरोप पनि उहाँले लगाउनु भयो ।
सो क्रममा उपाध्यक्ष गिरीले अरु पार्टीहरू सँग मात्र नभएर एमालेका जन वर्गीय सङ्गठन र अन्य विद्यार्थी सङ्गठनले अनेरास्ववियुका क्रियाकलाप बाट पाठ सिक्न आग्रह गर्नु भयो । साङ्गठनिक अभियान र व्यवस्थापनमा अनेरास्ववियुले मातृ पार्टी नेकपा एमालेलाई पनि कतिपय कुराहरू सिकाउने सङ्गठनका रूपमा स्थापित संस्था भएकोले यसमा गर्व गर्न पनि सबैलाई निवेदन गर्नु भयो । । शिक्षा क्षेत्रको सुधार आजको आवश्यकता रहेको भन्दै उहाँले शिक्षा क्षेत्रलाई व्यवस्थित र पारदर्शी बनाउने काममा अनेरास्ववियु लागी परेको पनि स्पष्ट पार्नु भयो ।
उक्त उद्घाटन सभामा अनेरास्ववियुका केन्द्रीय महासचिव नरेश रोका, नेकपा एमाले केन्द्रीय सदस्य तथा भक्तपुर जिल्ला इन्चार्ज कैलाश प्रसाद ढुङ्गेल, केन्द्रीय सदस्य माधव ढुङ्गेल, एमाले रामेछापका अध्यक्ष एवं वाग्मती प्रदेशसभाका सदस्य सदस्य आनन्द कुमार श्रेष्ठ , एमाले वाग्मती प्रदेश कमिटीका सदस्य तथा एमाले रामेछापका नेताहरूले पनि आ आफ्नो मन्तव्य राख्नु भएको थियो । उद्घाटन सभामा अन्य जनवर्गिय सङ्गठनका प्रतिनिधि,एमालेका नेता कार्यकर्ताहरूको पनि उल्लेखनीय रूपमा उपस्थिति रहेको थियो ।
कार्यक्रममा अनेरास्ववियुका का सचिव डा. सुजन कँडरियाले २२ वर्षसम्म विश्वविद्यालयको समेत पढाइ सकेर देश निर्माणमा लाग्ने गरी शैक्षिक नीति कार्यक्रम बनाउनु पर्ने धारणा राख्नु भयो । उहाँले देश विकासको पहिला आधार शिक्षा क्षेत्रका विकास भएकोले पनि अनेरास्ववियुले मुख्य प्राथमिकतामा राखेको पनि बताउनुभयो ।
शनिवार सकभर सर्व सम्मतिका आधारमा नयाँ नेतृत्व चयन गरेर अधिवेशन सम्पन्न हुने गरी कार्यक्रम तय भएको सङ्गठनले जनाएको छ । अधिवेसन (अनेरास्ववियु) का अहिलेका संयोजक मदन खड्का, सह–संयोजक हिमाल बोहरा र सचिव पुष्कर भट्टराईले अध्यक्षमा दाबी गरेका छन् । तीन जनाको दाबी रहे पनि सकेसम्म पार्टी र सङ्गठनले सहमतिको गरी नयाँ नेतृत्व घोषणा गर्ने तयारी भएको नेताहरूले बताएका छन् ।
यो बारेमा तपाईको प्रतिकृया