दलित महिलाहरुलाई पञ्चेवाजा बजाउन सिकाँउदै मन्थली नगर

मन्थली, ११ असार । मन्थली नगरपालिकाले जिल्लामा रहेका दलित महिलाहरुलाई पञ्चेवाजा वजाउने तालिम दिन सुरु गरेको छ । आज (मंगलवार) देखि सुरु भएको उक्त तालिम १० दिन सम्म चल्ने बताइएको छ । मन्थली नगरको आर्थिक सहयोग तथा पञ्चेवाजा संरक्षण समाज रामेछापको आयोजनामा सुरु भएको उक्त तालिमको उद्घाटन मन्थली नगर प्रमुख लव श्रेष्ठले पञ्चेवाजा अन्तर्गतको एक बाजा सनाई बजाएर गर्नु भएको थियो ।

तालिममा परियार, बि.क, मिजार समुदायका महिलाहरु सहभागि भएका छन् । दलित महिलाहरुलाई पनि पञ्चेवाजा वजाउन सिकाएर आत्मनिर्भर बनाउने उद्देश्यले यस प्रकारको तालिमका लागि मन्थली नगरले आबश्यक सहयोग गरेका मन्थली नगर प्रमुख लव श्रेष्ठले बताउनुभयो ।
जिल्लामा पञ्चेवाजा लोप हुने अबस्था आएपछि आफ्नो सकृयतामा पञ्चेवाजा संरक्षण समाज नामक संस्था गठन गरि यस अघि देखिनै बिभिन्न गतिविधिहरु सञ्चालन गरिएको र यस पटक पनि महिलाहरुलाई तालिम दिएर उहाहरुको छुट्टै समुह बनाएइ बाजा वजाउन लगाउने तयारीका साथ यो तालिमको आयोजना गरिएको समाजका पूर्व अध्यक्ष ज्ञान बहादुर सुन्दासले बताउनुभयो ।
तालिम पञ्चेवाजा संरक्षण समाजका अध्यक्ष गोपाल नेपालीको अध्यक्षतामा चलिरहेको तालिमकाे सहजीकरणा हात्तीराम नेपालीले गरिरहनु भएकाे छ ।