कर्मचारी सँगै साइनवोर्ड पनि हिडने कार्यालय

मन्थली,५ कार्तिक । रामेछाप जिल्लाको मन्थलीमा एउटा यस्तो कार्यालय छ जुन कार्यालय सडक बाट साइनवोर्ड हेरेर कार्यालय खुले नखुलेको थाहा हुन्छ ।
कर्मचारी छन् र कार्यालय खुलेको छ भने साइनवोर्ड बाहिर निस्कन्छ, छैनन भने साइनवोर्ड कर्मचारी सँगै हिड्छ ।
सुन्दा पनि अचम्म लाग्ने त्यो कार्यालय कुन हो भनेर सबैलाई कौतुहलता हुनु स्वभाविकै हो । त्यो कार्यालय शहरी बिकास तथा भवन कार्यालय सिन्धुलीको फिल्ड इकाई कार्यालय रामेछाप हो । उक्त कार्यालय रामेछापको मन्थली स्थीत तत्कालिन कटहरवोट नजिक रहेको रुद्र फुयालको घरमा रहेको छ । ५ वटा कोठा भाडामा लिएर सञ्चालन भएको उक्त कार्यालयमा कर्मचारी हुँदा साइनबोर्ड वाहिर राखिन्छ र कर्मचारी हिडे सँगै साइनवोडै पनि हुदैन । यस अघि कर्मचारी हुँदा बाहिर देखिएको साइनवोर्ड यो समाचार तयार पार्दा (सोमवार १ः३० बजे) सम्म बाहिर निस्केको छैन ।
सिन्धुली र रामेछाप दुई जिल्ला हेर्ने गरी यो कार्यालय सिन्धुलीमा रहेको छ । मन्थलीमा रहेको कार्यालय फिल्ड कार्यालय हो । यस विषयमा जिज्ञासा राख्दा कार्यालय प्रमुख दुर्गा प्रसाद घिमिरेले कर्मचारी हरु नभएको बेला निकालेका होलान भन्दै त्यस वारेमा सम्बन्धित फिल्डकै कर्मचारीसँग बुझ्न आग्रह गर्नुभयो ।
रामेछाप फिल्ड कार्यालयक कर्मचारी पप्पु शाह सँग सम्पर्क गर्दा आफुहरु धेरै जसो फिल्डमै रहने भएकोले वोर्ड निकालिएको आफुहरु कार्यालय आउना साथ वोर्ड राखिने बताउनुभयो ।
यस बिषयमा प्रमुख जिल्ला अधिकारी राजु प्रसाद पौडेलसँग जिज्ञासा राख्दा कर्मचारी भए वा नभएपनि साइनवोर्ड भने त्यसरी झीक्ने राख्ने गर्नु नहुने बताउनुभयो । उहाले यस बिषयमा सम्बन्धित कार्यालय प्रमुख सँग सम्पर्क गरी थप कुरा बुझ्ने पनि बताउनुभयो ।
यस कार्यालयले रामेछापको मन्थली नगरपालिका दोरम्वा शैलुङ्ग गाउपालिका लगाएतका विभिन्न स्थानका फरक फरक वडाहरुमा करोड भन्दा माथिका योजना हरु टेन्डर प्रकृयावाट सञ्चालन गर्ने तयारी गरिरहेको छ ।