२९ असार, २०७६
मन्थली- अपाङ्गता भएका व्यक्तिहरुले आफूहरुलाई राज्यले फरक दृष्टिले हेर्ने गरेको गुनासो गरेका छन् । मन्थली नगरपालिकाले आइतबार अपाङ्गता भएका व्यक्तिहरुका लागि राखेको एक दिने अभिमुखीकरण कार्यक्रममा बोल्दै अपाङ्गता अधिकारकर्मी पुरुषोत्तम घिमिरले अझै पनि राज्यले आफूहरुलाई सकारात्मक दृष्टिले नहेर्दा समाजमा अपहेलित हुनु परेको गुनासो गर्नुभएको हो । त्यस्तै कार्यक्रममा आफ्नो गुनासो राख्दै अपाङ्गता अधिकारकर्मी कविता श्रेष्ठले अपाङ्गता भएका व्यक्तिहरुलाई लक्षित गरी स्थानीय सरकारले प्याकेजकै रुपमा कार्यक्रम ल्याउन माग राख्नुभयो ।
मन्थली नगरपालिका भित्र रहेका अपाङ्गता भएका व्यक्तिहरुलाई लक्षित गरी नगरका सबै वडा सचिबहरु, नगरपालिकाका कर्मचारी र अपाङ्ग अगुवाहरुलाई लक्षित गरी उक्त अभिमुखीकरण राखिएको हो ।
कार्यक्रममा बोल्दै मन्थली नगरपालिकाका नगर प्रमुख रमेश कुमार बस्नेतले अपाङ्गता भएका व्यक्तिहरुको आर्थिक र सामाजिक विकासका लागि नगरपालिकाले सबैखाले सहयोग गर्ने प्रतिबद्धता जनाउनुभयो । कार्यक्रमको प्रमुख अतिथि समेत रहनुभएका नगर प्रमुख बस्नेतले आगामी दिनमा अपाङ्गता भएका व्यक्तिहरुलाई लक्षित गरी पालिकाले प्याकेजमै कार्यक्रममा ल्याउने बताउनुभयो ।
कार्यक्रममा बोल्दै नेपाल पत्रकार महासंघ रामेछापका अध्यक्ष रमेश ढुङ्लले अपाङ्गताको सवाललाई राज्यले उचित ढङ्गले सम्बोधन गर्न नसकेको आरोप लगाउनुभयो । उपप्रमुख माया कुमारी कार्कीको अध्यक्षतामा भएको कार्यक्रममा नगरपालिकाका उपसचिब दीपक सुवेदी, सामाजिक विकास अधिकृत गोविन्द कट्टेल र अपाङ्ग सचेतन सेवा केन्द्र रामेछापका अध्यक्ष बद्री नयाँघरेले सहजीकरण गरेका थिए । कार्यक्रम मन्थली नगरपालिकाको आर्थिक सहयोगमा सम्पन्न भएको हो ।
यो बारेमा तपाईको प्रतिकृया