रामेछाप- खेलकुदको क्षेत्रबाट समृद्ध राष्ट्र बनाउन सकिने भए पनि सरकारले खेलकुद विकासमा देखाएको उदासीनताका कारण नेपालको खेलकुदमा भने जति विकास हुन सकेको छैन् । खेलकुदकै माध्यमबाट विकास गर्न सकिने आधारहरु धेरै भएको र सरकारले खेलकुदलाई प्राथमिकतामा नराखे पनि सहयोगी हातहरु जुटे भने ग्रामिण क्षेत्रबाटै खेलकुदलाई विकास गर्न सकिन्छ भन्ने उद्देश्यका साथ रामेछाका एक व्यक्तिले खेलकुद विकासमा करोड खर्च गरि सक्नुभएको छ ।
रामेछापको उमकुण्ड गाउँपालिका वडा नम्बर ७ भुजी घर भई हाल बेलायतमा बसोबास गर्ने पूर्व व्रिटिस आर्मी बुद्धी बहादुर सुनुवारले सुविधा सम्पन्न खेल मैदान बनाउने योजनाका साथ अमृत घामछाँया खेलकुद मैदान नाम दिएर खेलकुद विकासमा एक्लो प्रयास सुरु गर्नुभएको हो । २१ वर्ष अघि देखि नै सुनुवारले खेलकुद विकासमा टेवा पु¥याउने उद्देश्यका साथ आफ्नो नाउँमा रहेको पाखो जग्गालाई सम्याएर खेल मैदान बनाउनकै लागि पटक–पटक गरी ३५ लाख भन्दा माथि खर्च गरिसक्नु भएको छ । त्यस्तै ९ वर्ष अघि सुनुवारकै सहयोगमा भुजी लिगको स्थापना गरी यस वर्ष भुजी लिगको ९ औं संस्करण समेत खेलाई सकिएको छ । आफूले स्थापना गरेको भुजी लिगको परिणाम राम्रो देखिँदै जान थालेकाले खेलकुदको माध्यमबाट ग्रामिण क्षेत्रको विकास गर्न सकिने बलिया आधारहरु भएकाले अहिले खेलकुद विकासको यात्रामा रहेको लिखु भुजी रामेछाप युवा क्लबको नाममा स्थानीय मूल्य अनुसार ५५ लाख बराबरको ६ रोपनी १० आना जग्गा समेत नामसारी गरिदिनुभएको छ ।
त्यस बाहेक समाजसेवी सुनुवारले भुजी लिग रनिङ सिल्डको लागि आवश्यक बजेटको समेत व्यवस्थापन गरिदिने गरेको लिखु भुजी रामेछाप युवा क्लबका अध्यक्ष शेर कुमार सुनुवारले बताउनुभयो । मान्छे नै बस्न छोडेको गाउँमा करोडौ खर्च गरेर खेलकुद विकासमा समाजसेवी सुनुवारले देखाएको सहयोगलाई सबैले उच्च मुल्यांकन गर्नु पर्ने क्लबका अध्यक्ष शेर कुमार सुनुवारले बताउनुभयो ।
शुक्रबार मालपोत कार्यालय रामेछापमा क्लबको नाममा जग्गा नामसारी गर्दै समाजसेवी सुनुवारले ग्रामिण क्षेत्रलाई खेलकुदको माध्यमद्धारा विश्व सामू नेपालीलाई चिनाउन देशको शीर नै उच्च रहने भएकाले आफूले खेलकुदको क्षेत्रमा व्यक्तिगत सहयोग गरेको बताउनुभयो । उहाँले भुजीमा अन्तराष्ट्रिय स्तरको खेलमैदान बनाउने गरी आफू लागी परेको समेत बताउनुभयो ।
यो बारेमा तपाईको प्रतिकृया