रामेछाप– जिल्ला संम्बाद समूह रामेछापको शुक्रबारको बैठकले पछिल्लो समयमा गाउँको अवस्था जटिल बन्दै गएको निष्कर्ष निकालेको छ । समूहको लामो समयपछि बसेको भरचुवेल बैठकका सदस्यहरुले कोरोना संक्रमणको पीसिआर परिक्षणको दायर बढाउन नसके गाउँको अवस्था झन जटिल हुँदै जान सक्ने निष्कर्ष निकालेको छ ।
सरकारले लकडाउन लगाएसंगै गाउमा बढेको जनघनत्वले बिस्तारै खाद्यन्नको संकट देखा पर्ने संभावना एकातिर देखिएको छ भने अर्कातिर लुकिछिपी बाहिरबाट आउने मानिसहरु र तिनिहरुको पीसीआर परिक्षणको दायरा फराकिलो नपारे सम्म गाउँमा जतिसुकै बेला पनि अप्ठेरो अवस्था आउन सक्ने दोरम्बाबाट प्रतिनिधित्व गरेका समूहका सदस्य एवं नेकपाका नेता तुल प्रसाद कडेलले बताए । उनले भने– ‘यसको लागि स्थानीय प्रशासन र स्थानीय सरकारबिच समन्वय हुनु जरुरी छ । मान्छेको आगमनको गति र खाद्यन्न ढुवानी आदी बाट संक्रमण सर्न सक्ने भएकाले सबै स्थानीय सरकारहरुको मिलेमतोमा पीसिआर परिक्षण किट खरिद गर्ने सम्मको पहल गर्नु पर्ने हुन्छ ।’
खाँडादेवी गाउँपालिकाबाट प्रतिनिधित्व गरेका समितिका अर्का सदस्य अधिवक्ता शिव कुमार कार्कीले सरकारको काम गराईको तरिका अव्यवहारिक र भरपर्दाै नभएकोले यसलाई प्रभावकारी बनाउन नसके अवस्था थप जटिल हुन सक्ने बताए । उनले भने– ‘अहिले सरकारी तवरबाट भए गरेका कामहरुले दीर्घकालीन निकास दिन नसक्ने भन्दै सबैभन्दा पहिले पिसिआर परिक्षणको दायरालाई संघीय सरकार र स्थानीय सरकारले आपसि समन्वयमा भरपर्दाे तरिकाले अगाडी बढाउन सक्ने बातावरण तयार गर्नुपर्छ ।’
उमाकुण्ड गाउँपालिकाबाट प्रतिनिधित्व गर्ने अर्का सदस्य एवं नेपाली काँग्रेसका नेता झपडराज भण्डारीले पनि अवस्था यहि अवस्थामा अगाडि बढे भोलीको दिनमा जटिल हुन सक्ने भएकाले स्थानिय सरकारलाई थप जिम्मेवार बनाउनका लागि संवाद समुह मार्फत आवश्यक कदम चाल्न पनि आग्रह गरे ।
अर्का सदस्य एवं रामेछाप उद्योग बाणिज्य संघका पूर्व अध्यक्ष पशुपति बहादुर खड्काले पनि सबै पक्षले जिम्मेवारीका साथ काम गर्नु पर्ने र त्यसका लागि स्थानीय प्रशासनको भूमिकालाई थप जिम्मेवार बनाउने बातावरण तयार गर्न आग्रह गरे । उनले अहिले पनि गाउँको अवस्थालाई लक डाउनले कुनै पनि असर नगरेको र लक डाउनको समयमा सबै खालका गतिविधि पहिलेकै अवस्थामा भईरहेकोले यसलाई न्यूनिकरण गर्ने वातावरण सृजना गर्न पनि आग्रह गरे । त्यस्तै समाजका सदस्य नेपाल पत्रकार महासंघका अध्यक्ष रमेश ढुंगेलले कोरोनाको संक्रमण गाउँमा भन्दा मन्थली लगाएतका मुख्य बजार हरुमा फैलन सक्ने भन्दै यसको नियन्त्रका लागि स्थानीय प्रशासनले गम्भिरताका साथ सोच्नु पर्ने धारणा राखेका थिए । उनले परिस्थीति नियन्त्रण बाहिर गयो भने त्यसबाट आउने परिणाम भयावह हुन सक्ने भएकाले त्यसतर्फ संजालले पहल गर्नु पर्ने बताएका थिए ।
वैठकले तत्काल जिल्लाका सबै स्थानीय सरकारका प्रमुख र स्थानीय प्रशासनसंग समन्वय गरि सबै पालिकाहरुमा मौजुदा खाद्यन्नको अवस्थाको आँकलन गरि भावि दिनको अवस्थाको बारेमा तयारी गर्नु पर्ने बारेमा पनि छलफल भएको समुहका प्रतिनिधि टिका भट्टले बताए ।
बैठकमा कोरोनाको संभावित संक्रमणलाई निश्तेज गर्न सक्ने कामका बारेमा छलफल गर्ने र सबै सरकारको समेत संयुक्त सहयोगमा पीसीआर परिक्षणका लागि छुट्टै किट खरिद गरि परिक्षणको दायरालाई दू्रत र छरितो बनाउन पहल गर्ने निष्कर्ष निकालेको समेत भट्टले बताए ।
यो बारेमा तपाईको प्रतिकृया