रामेछाप २ कार्तिक । मन्थलीमा सृजनशील टावर सञ्चालनमा आएको छ । जिल्ला भित्र र राजधानी काठमाडौँमा रहेर पनि जिल्लाको प्राज्ञिक विकासमा र विभिन्न रचनात्मक विकासको काम गर्दै आएको रामेछाप काठमाडौँ सृजनशील समाज नामक गैर सरकारी संस्थाले आफ्ना सदस्यहरू सँगको सहयोग र स्थानीय सरकार संगकोे समन्वयमा निर्माण गरेको हो । उक्त टावरको वडा अध्यक्ष होम प्रसाद पौडेल,डा सुमन कर्माचार्य र संस्थाका संयोजक कृष्णहरि बुढाथोकी समेतले सामूहिक रूपमा उद्घाटन गरे सँगै उक्त टावर बिहीबार बाट विधिवत् रूपमा सञ्चालनमा आएको हो ।
सिँचाइ डिभिजन कार्यालय मन्थली भन्दा मुनि मन्थली नगरपालिकाको कार्यालय झर्ने लक्ष्मी नारायण मन्दिर चोक देखिको करिब २ सय मिटर परको चक्रपथ घुम्तीमा निर्माण गरिएको उक्त टावर मन्थली बजारको अत्यन्त मनमोहक ठाउँमा रहेको छ । बजारमा परिक्रमा गर्दे गर्दा र विशेष गरी गर्मीको मौसममा बिहान बेलुकाको यात्रा पछि सुस्ताउँदै मनमोहक मन्थली फाँट,सुन्दर मन्थलीको एयरपोर्ट र लोभलाग्दो हिमशृङखलाको दृश्यावलोकन गर्न पाइने भएकोले पनि निर्मित टावरको छुट्टै महत्त्व रहने डा सुमन कर्माचार्यले बताउनु भयो ।
संस्थाका पदाधिकारी र दानवीर सदस्यहरूबाट उठेको १ लाख रुपैयाँको लागतमा निर्माण गरिएको उक्त फलामे टावरको निर्माण सँगै त्यसबाट स्थानीय र बाहिर पर्यटकहरू समेत सजिलै लाभान्वित हुने विश्वास संस्थाले लिएको छ । टावरको वरिपरि सर्वसाधारणलाई उभिएर दृश्यावलोकन गर्न र बस्नको लागि फलामे बेन्चीको पनि व्यवस्था रहेको संस्थाका अध्यक्ष विपीन भट्टराईले जानकारी दिनु भयो ।
टावरको निर्माण सँगै सृजनशीलले मन्थलीको सुन्दरतामा थप सहयोग पुर्याउनका लागि हाललाई मन्थली बजारको वाणिज्य बैङ्क चोक देखि प्रशासन कार्यालय जाने बाटो हुँदै उक्त बाटोको अन्त्य हुने ठाउँ लक्ष्मी नारायण चोक सम्मको चक्रपथलाई प्लास्टिक मुक्त सडक बनाउनका लागि एक दर्जन जति डोको राखेर पाल्ष्टीकमुक्त चक्रपथ बनाउन अभियान पनि चलाइरहेको छ । त्यस बाहेक संस्थाले आगामी दीनमा स्थानीय सरकार सँगको सहकार्य तथा बजार वासीहरू समेतको समन्वयमा उक्त सडकलाई हरित सडकको रूपमा विकास गर्ने फलफलु लगायत विभिन्न जातको बिरुवा रोप्ने तयारी गरिरहेको पनि संस्थाका संयोजक कृष्णहरि बुढाथोकीले सो बारेमा जानकारी दिनुभयो ।
यो बारेमा तपाईको प्रतिकृया