रामेछाप १४ पुस । संविधान सभा सदस्य तथा रामेछापकी एक साहसी महिला अनि समाजसेवी दालकुमारी सुनुवारको निधन भएको छ । रामेछापको उमा कुण्ड ६ गुप्तेश्वर घर भएकी राष्ट्रिय प्रजातन्त्र पार्टीकी केन्द्रीय सल्लाहकार समितिकी सदस्य तथा सुनुवार सेवा समाज सङ्घीय सल्लाहकार समितिकी सदस्य सुनुवारको आज दिउँसो नेपाल क्यान्सर हस्पिटल हरिसिद्धि ललितपुरमा उपचारको क्रममा मृत्यु भएको राष्ट्रिय प्रजातन्त्र पार्टी रामेछापका जिल्ला अध्यक्ष भरत बाइबाले जानकारी दिनुभयो ।
लामो समय देखि थाइराईड क्यान्सर रोगका कारण भारतमा गएर उपचार गराई रहनु भएकी सुनुवारलाई केही समय देखि नेपाल क्यान्सर हस्पिटल हरिसिद्धि ललितपुरमा राखेर उपचार गराइँदै आएको थियो । उहाँको दिउँसो करिब ३ बजेको समयमा उपचारका क्रममा मृत्यु भएको पनि बाइबाले जानकारी दिनुभयो ।
सुनुवारको पार्थिव शरीरलाई आइतबार १० बजे देखि अन्तिम श्रद्धान्जलिका लागि राप्रपाको केन्द्रीय कार्यालयमा राखिने र दिउँसो १२ बजे पशुपतिको आर्यघाटमा लगेर दाह संस्कार गर्ने कार्यक्रम तय भएको पनि जिल्ला अध्यक्ष बाइबाले जानकारी दिनुभयो ।
यसै बिच राष्ट्रिय प्रजातन्त्र पार्टी जिल्ला समिति रामेछापले शनिवारै एक विज्ञप्ति प्रकाशित गरी स्वर्गीय दाल कुमारी सुनुवारको निधनले सिङ्गो पार्टी र जिल्लालाईनै क्षति पुगेको जनाएको छ । पार्टी अध्यक्ष भरत वाईवाद्धारा जारी विज्ञप्तिमा सानैै उमेर देखि राजनिति र सामाजिक क्षेत्रमा क्रियाशिल संविधान सभाकी सदस्य तथा एक साहासिक महिला नेतृको निधनले आफ्नो पार्टी र जिल्लालाईनै अपूरणीय क्षति पुगेको भन्दै सुनुवारको निधनको खबरले आफू पनि अत्यन्तै मर्माहत भएको भन्दै दिवङ्गत आत्मा प्रति चिर शान्तिको कामना गर्दै उहाँ प्रति भावपूर्ण श्रद्धाञ्जली अर्पण गर्नुका साथै यस दुःखद घडीमा शोक सन्तप्त परिवारजन प्रति हार्दिक समवेदना पनि प्रकट गर्दछु,विज्ञप्तिमा उल्लेख गरिएको छ ।
यो बारेमा तपाईको प्रतिकृया