रामेछाप, २५ पुस । बिहीबार बाट माघ ७ गते सम्म सदरमुकाम मन्थलीमा हुन लागेको वृहत् महोत्सवको तयारी पुरा भएको छ । बिहीबार बागमती प्रदेश सरकारका मुख्य मन्त्री सालीगराम जमरकट्टेले उद्घाटन गर्ने उक्त महोत्सवको लागि आवश्यक सबै तयारी पुरा भई सकको आयोजक पक्षले जनाएको छ ।
रामेछाप उद्योग वाणिज्य संंघको आयोजनामा हुन लागेको उक्त महोत्सव स्थलका लागि आवश्यक पर्ने मञ्च देखि विभिन्न कृषि बस्तुको विक्री र प्रदर्शनीका लागि तयार गरिएका अधिकांश स्टलहरू बुक भई सकेका छन् । स्थानीय उत्पादन र बजारी करणलाई प्राथमिकता भित्र राखेर महोत्सवको तयारी भएको आयोजक संस्थाका सचिव यज्ञ सुवेदीले जानकारी गराउनु भएको छ ।
महोत्सवको तयारी स्वरूप बजारका विभिन्न ठाउँमा स्वागत ढोका बनाउने देखि बजार क्षेत्रमा टाँगिएको स्वागत ब्यानर र तोरणले पुरै बजार बेहुलीझैँ सिँगारिएको हो ।
कार्यक्रमका लागि करिब ७० लाख रुपैयाँ खर्च हुने अनुमान गरेको आयोजकले त्यसका लागि पनि जिल्लाका सबै स्थानीय तह,जिल्ला स्थित राजनीतिक दल,आम सञ्चार माध्यम र सरकारी तथा गैर सरकारी सङ्घ संस्था सँग समेत समन्वय गरेर काम गरिएको आयोजक संस्था रामेछाप उद्योग वाणिज्य सङ्घका सचिव सुवेदीले जानकारी दिनुभयो ।
“रामेछापको दिगो विकास र अर्थतन्त्रको आधार‘ कृषि, जलस्रोत, पर्यटन तथा उद्योगको पूर्वाधार ” भन्ने मूल नारालाई सार्थक बनाउने मूल उद्देश्यका साथ गर्न लागिएको महोत्सवमा जिल्लाका सबै स्थानीय निकायमा उत्पादन भएका मुख्य कृषिवालीको बजारीकरण र आन्तरिक तथा बाह्य क्षेत्रका पर्यटक हरूलाई समेत महोत्सवमा आउनका लागि आवश्यक वातावरण निर्माण गरिएको छ ।
महोत्सवका लागि बाह्य र आन्तरिक गरी ५० हजार दर्शक भित्र्याउने लक्ष्य सहित छिमेकी तथा अन्य बाह्य जिल्लाहरूमा पनि खबर गरी सकिएको पनि अध्यक्ष थापाले जानकारी दिनुभयो ।
महोत्सवको आकर्षणलाई नागरिक मैत्री बनाएर स्टलमा राखिने जिल्लाको पहिचानका रूपमा रहेका उत्पादनहरू आलु, जुनार,सुन्तला, किवी, र ढाकाको कपडा र सामानहरूको बजारी करणमा पनि ध्यान पु¥याइने छ । ११ दिन चल्ने महोत्सवको अवलोकनका लागि जिल्ला भित्र र बाहिरका गरी करिब ५० लाख दर्शक भित्र्याउने लक्ष्य आयोजकले राखेको छ ।
महोत्सवले आर्थिक मन्दी र व्यवसायमा आएको गिरावटले सुस्ताएको मन्थली बजार चलायमान हुने समेत अपेक्षा आफूहरूले गरेको र त्यसको आकर्षणका रूपमा जिल्ला तथा राष्ट्रिय स्तरका कलाकारहरूको समेत बेजोड प्रस्तुति रहने छ । त्यसैगरी महोत्सव स्थलमा रोगटे पीङ, बाल उद्यान पार्क लगायत विभिन्न मनोरञ्जनको सामागि राख्ने तयारी पनि आयोजक पक्षले गरेको छ ।
गाउँमा उत्पादित कृषि उत्पादन र उद्यमीहरूको उत्पादनलाई महोत्सव स्थलमा राखेर बेच विखन तथा प्रदर्शनका लागि सहज वातावरण बनाउनुका साथै महोत्सवका क्रममा आउन सक्ने विभिन्न वाधा अड्चन र समस्यालाई सहजिकरण गर्नका लागि पनि आयोजकले विभिन्न उप समिति निर्माण गरी सोही अनुसारको जिम्मेवारी दिएकोले पनि काम तामेलीमा सहज भएको पनि सचिव यज्ञ सुवेदीले जानकारी गराउनु भयो । उहाँले महोत्सवलाई साझा महोत्सवका रूपमा सफल बनाउनु सबैको दायित्व भएकोले पनि सबै जिल्लावासीहरू सँग आग्रह गर्नुभयो ।
यो बारेमा तपाईको प्रतिकृया