मन्थली,२१ बैशाख । नेपाल रेडक्रस सोसाइटी केन्द्रीय समिति काठमाण्डौ द्वारा जारी गरिएको पालिका,जिल्ला र प्रदेश र केन्द्रीय अधिबेशनको कार्यक्रम अर्को सूचना जारी नभएसम्मका लागि स्थगित भएको छ ।
जिल्ला प्रशासन कार्यालय काठमाण्डौले नेपाल रेडक्रस सोसाइटी केन्द्रीय समितिलाई एक पत्र प्रेषित गरी निर्वाचनका सबै कार्यक्रमहरु स्थगित गर्न निर्देशन दिएको हो ।
जिल्ला प्रशाशन कार्यालय काठमाण्डांैका प्रजिअ इश्वरराज पौडेलद्वारा हस्ताक्षरित पत्रमा परिवर्तित सन्दर्भमा नेपाल रेडक्रस सोसाइटीको तल्लो तह देखि क्रमशः केन्द्रीय तह सम्म प्रतिनिधि चयनको कार्यलाई निश्पक्ष, स्वतन्त्र र जवाफदेही ढबाट निर्वाचनको प्रकृया मार्फत अघि बढाउनु पर्ने र यसका लागि विधानमा यथोचित संबोधन सहितको संशोधन,सदस्यताको खुल्ला आब्हन,प्रत्येक तहका प्रतिनिधिको स्वच्छ प्रतिस्पर्धाको सुनिश्चितता गर्दै सक्षम नेतृत्वको चयन सहित बर्षौ देखिको रेडक्रस जस्तो पवित्र संस्थामा भएका अमर्यादित गतिविधिहरु निर्मूल गर्नुपर्ने र नेपाल रेडक्रस सोसाइटी रुपान्तरण तथा पुस्तान्तरणको सुनिश्चितता हुनेगरी आश्वस्थ गर्नुपर्ने भएकोले अर्को सूचना जारी नभएसम्मका लागि सम्पुर्ण निर्वाचन प्रकृया स्थगित गर्न भनिएको छ ।
केन्द्रीय समितिले यही २०८३ बैशाख २६ देखि जेठ ४ गते सम्म देसभरका सबै पालिका शाखा समिति, जेठ १५ गते सबै जिल्ला शाखा समिति,असार २ गते सात वटै प्रदेश शाखा समिति साथै असार २४ र २५ गते केन्द्रीय समितिकोको अधिबेशन सम्पन्नगर्ने कार्यक्रम तय गरेकाे थियाे ।
नेपाल रेडक्रस सोसाइटी रामेछाप शाखाका मन्त्री दुर्गा बहादुर श्रेष्ठका अनुसार –रामेछाप जिल्लाका ८ वटा पालिका मध्ये लिखु तामाकोसी गाँउपालिकामा यही बैशाख २६ गते, मन्थली नगरपालिकामा बैशाख २७ गते, रामेछाप नगरपालिकामा बैशाख २९ गते र सुनापति गाँउपालिकामा यही जेठ २ गतेका लागि पालिका अधिबेशनको मिति तय भैसकेको थियो ।
