सुनुवार दम्पतीको असल काम, समाजसेवामा चम्काउँदै नाम

३० बैशाख, २०७६

रामेछाप– अहिलेको युगमा समाज सेवा गरेर नाम चम्काउने कुरा त्यति सजिलो छैन् । र यो काम सजिलो पनि हैन् । तर, समाज सेवा लाईनै आफ्नो जिन्दगी ठान्दै आएका उमाकुण्ड गाउँपालीका–६ गुप्तेश्वर बस्ने उमेरले ७७ वर्ष पार गरेकी पूर्व राजपरिषद् सदस्य एवं पहिलो संविधानसभा सदस्य दालकुमारी सुनुवार र उहाँका ८५ वर्षिय पति पूर्व ब्रिटिस लप्टन मानबहादुर सुनुवारको जोडीले समाज सेवालाई निरन्तरता दिइरहनुभएको छ ।

पञ्चायत कालदेखिनै राजनीतिसँगै समाज सेवामा लाग्नु भएका सुनुवार दम्पतीले सोमबार उमाकुण्ड–६ गुप्तेश्वरको वडा कार्यालयलाई भवन निर्माणका लागि २ रोपनी १ आना जग्गा निःशुल्क रुपमा दिनुभएको छ । सोमबार सुनुवार दम्पतीले मालपोत कार्यालय मन्थलीमा पुगेर वडा कार्यालयको नाममा जग्गा पास गरिदिएका हुन् ।

गाउँपञ्चायत देखि गणतन्त्र नेपालको पहिलो संविधानसभा सदस्य सम्मको राजनीति र सामाजिक विकासको राम्रो अनुभब बटुल्न सफल दालकुमारी सुनुवार र उहाँका पति लप्टन मानबहादुर सुनुवारले यस अघि पनि आफ्नो गाउँ गुप्तेश्वको स्वास्थ्य चौकी भवन निर्माणको लागि ४ रोपनी र स्थानीय  विद्यालय निर्माणको लागि ६ रोपनी जग्गा निःशुल्क दिई सक्नु भएको छ ।

त्यसैगरि धर्म र संस्कृतिको जगेर्ना गर्दे धार्मिक पर्यटन मार्फत गाउँको विकासलाई टेवा पु¥याउने उद्देश्यले गुप्तेश्वर आफ्नै निवास नजिक चापाबोटेमा शिब, राधाकृष्ण, बुद्ध, नाग र सरस्वतीको मुर्ति राखेर सबै धर्म मान्ने नागरिकलाई एउटै मन्दिरमा पुजा पाठ गर्न मिल्ने गरि पशुपतीनाथको मन्दिर निर्माण गरि सकेका छन् । जग्गा बाहेक मन्दिर निर्माण र मुर्ती खरिद लगाएतका काममा मात्र दम्पती जोडीले  ३० लाख माथी खर्च गरेका छन् ।

सुनुवार दम्पतीले मन्दिरमा हिन्दु, बौद्ध र कृष्ण प्रणामीहरुलाई छुट्टा–छुट्टै पुजा गर्न मिल्ने र हिन्दु पराम्परा अनुसार बिबाह र ब्रतबन्ध समेत मन्दिरमा नै  गर्न मिल्ने ब्यबस्था मिलाएका छन् । त्यसका लागि उनिहरुले गुरुयोजनानै बनाएर मन्दिर परिसरमा फूल बगैँचा, भक्तजनहरुलाई पुजा गर्ने ठाउँ, मन्दिरमा पुजा गर्ने पुजारी, पुजारी बस्ने  घर लगाएतका संरचना काम समेत अहिले तिब्र रुपमा गरिरहेका छन् । सुनुवार दम्पतीका अनुसार गुरु योजना बनाएर गरिरहेको मन्दिरको सबै काम सम्पन्न गर्न करिब एक करोड खर्च हुने छ । उमाकुण्ड गाउँपालिकाका अध्यक्ष शेरबहादुर सुनुवारले सुनुवार दम्पतीले समाज सेवाका नाममा समय–समयमा गरेको योगदानको सबैले खुलेर प्रशंसा गर्नु पर्ने बताउनुभयो ।   निस्वार्थ रुपमा दान गरेर जीवनको उत्तरार्ध सम्म पनि नथाकी समाज सेवालाईनै आफ्नो जीबन ठान्ने उनिहरुको योगदान अतुलनिय रहेको पनि अध्यक्ष सुनुवारको भनाई रहेको छ ।