रामेछाप ४ असार । रामेछाप जिल्लामा पहिलोपटक अन्तर जिल्ला प्रथम खुला डुंगा दौड प्रतियोगिता शनिबार बाट सुनकोसी र तामाकोसी नदिको संगम स्थल त्रिवेणीमा सुरु भएको छ । उक्त प्रतियोगिताको उद्घाटन राष्ट्रिय खेलकुद परिषद्का सदस्य सचिव टंकलाल घिसिङले गर्नुभएको थियो ।
माझीको परम्परागत पेशाको संरक्षण र प्रवद्र्धन गर्ने उद्देश्यले उक्त प्रतियोगिताको आयोजना गरिएको हो । सुनकोसीमा परम्परागत सिमलको डुंगा चलाएर वारिपारि गर्ने उक्त प्रतिस्पर्धामा माझी समुदायले मात्र सहभागिता गर्न पाउनेछन् ।
एकल प्रतिस्पर्धातर्फ २ जना र डबलतर्फ ४ जना बसेर प्रतिस्पर्धा गर्नुपर्ने उक्त प्रतियोगिताको नियम छ । जस अन्तर्गत अधिकतम ५० मिटरको दूरीमा सुनकोसी वारिपारि गर्नुपर्ने हुन्छ । प्रतियोगितामा देशभरका २० टिमको सहभागिता रहेको छ ।
प्रतियोगितामा पहिलो, दोस्रो र तेस्रो हुनेलाई डबलतर्फ ३० हजार, २० हजार र १० हजार रुपैयाँ तथा एकलतर्फका विजेतामध्ये पहिलो हुनेलाई २० हजार, दोस्रो हुनेलाई १५ हजार र तेस्रो हुनेलाई १० हजार पुरस्कार राखिएको छ ।
राष्टिय खेलकुद परिषदको आयोजना,मन्थली नगरपालिकाको सहयोग,माझी उत्थान संघको समन्वय र जिल्ला खेलकुद विकास समीतिको ब्यवास्थापनमा उक्त प्रतियोगिता सुरु भएको हो । प्रतिकुल मौसमका कारण निर्धारित समयमा कार्यक्रम सुरु गर्न नसक्दा प्रतियोगिता दुई दिन सम्म चल्ने जिल्ला खेलकुद विकास समितिका कार्यालय प्रमुख केशब कटेलले जानकारी दिनुभयो ।
जिल्ला खेलकुद विकास समितिका अध्यक्ष सरोज घागा मगरको अध्यक्षता र राखेपका सदस्य सचिब घिसिङको प्रमुख आतिथ्यतामा सम्पन्न उक्त जिल्लाका माझीहरूले सहभागिता जनाएका छन् ।
यो बारेमा तपाईको प्रतिकृया