जिल्ला निर्वाचनको मिडिया अभिमुखिकरण

रामेछाप,२० कार्तिक । मंसिर ४ गते हुने प्रतिनिधि सभा र प्रदेश सभा निर्वाचनलाई कसरी निश्पक्ष,पारदर्शी र मिडिया मैत्री बनाउन सकिन्छ भन्ने उदेश्यले जिल्ला निर्वाचन कार्यालय रामेछापले आईतवार मन्थलीमा जिल्ला स्तरीय मिडिया अभिमुखीकरण कार्यक्रम सम्पन्न गरेको छ ।

निर्वाचन अघि र पछिको समयमा सञ्चार माध्यमहरुले खेल्नु पर्ने भूमिकाको बारेमा जानकारी दिने र निर्वाचन प्रयोजनका लागि सञ्चार माध्यमहरुको समुचित प्रयोगलाई कसरी सकरात्मक बनाउन सकिन्छ र त्यसका लागि पत्रकारहरुको गुनासाहरु भए त्यसको पनि सम्बोधन गर्ने उद्देश्यले उक्त कार्यक्रम सञ्चालन गरिएको हो ।
साहायक प्रमुख जिल्ला अधिकारी अनोज कुमार घिमिरेको अध्यक्षता एबं मुख्य निर्वाचन अधिकृत इन्दिरा शर्माको प्रमुख आतिथ्यतामा उक्त कार्यक्रममा सम्पन्न भएको हो । कार्यक्रमका अध्यक्ष एबं सहायक प्रमुख जिल्ला अधिकारी घिमिरेले आचार संहिता पालना गर्नु सबैको कर्तब्य भएकोले पत्रकारहरुले आफुले पनि आचार संहिता पालना गर्नुपर्ने र अरुले पालना गरे नगरेको पनि अनुगमन गर्नुपर्ने कुरामा पनि जोड दिनुभयो ।
कार्यक्रमका अबसरमा बोल्दै मुख्य निर्वाचन अधिकृत शर्माले निर्वाचनलाई प्रभावकारी ढंङ्गबाट सम्पन्न गर्न पत्रकारहरुको महत्वपूर्ण भुमिका हुने हुँदा त्यसका लागि आबश्यक सहयोग गर्नका लागि पनि आग्रह गर्नु भयो । सबै पत्रकार हरु संँग अनुरोध गर्नुभयो । उँहाले भन्नुभयो – मिडिया र निर्वाचनको सम्बन्ध नङ र मासुको जस्तै हुने भएकोले निर्वाचनमा संचार माध्यमहरुको मिडियाहरुको प्रयोगलाई सकरात्मक तरिकाले उपयोग गर्नुपर्ने बताउनुभयो ।
कार्यक्रमका अबसरमा जिल्ला निर्वाचन अधिकृत मधुकर शाहले निर्वाचन प्रयोजनका लागि निर्वाचन आयोगले केन्द्र र जिल्ला तहमा हाल सम्म गरेको बस्तुगत प्रगतिका बारेमा जानकारी गराउनु भएको थियो । त्यसैगरी उहाँले निश्पक्ष निर्वानका लागि आयोग र मिडियाको सम्बन्धी निर्वाचनका वेला पत्रकारहरुले पालना गर्नुपर्ने आचारसंहिताका वारेमा जानकारी गराउनुभएको थियो ।

उहाँँले निर्वाचनलाई स्वच्छ,निश्पक्ष ढंगवाट सम्पन्न गर्न सबै सरोकारवालाहरुको सहयोगको अपेक्षा गर्नुभयो । उहाले भन्नुभयो– “निर्वाचनका धेरै कामहरु भैसकेका छन् अब कर्मचरी परिचालन र निर्वाचनका आबश्यक सामाग्री मतदान केन्द्र सम्म ढुवानी गर्न मात्र बाँकी रहेको बताउनुभयो ।”
कार्यक्रममा पत्रकार महासंघ रामेछापका अध्यक्ष बद्रि नयाँघरेले निर्वाचनमा सञ्चार माध्यम र सञ्चारकर्मीहरुको भुमिका विषयमा प्रस्तुतिकरण गर्नु भएको थियो । पत्रकार महासंघ रामेछापका निवर्तमान अध्यक्ष टिका प्रसाद भट्टले निर्वाचन आचारसंहिता सबैले पालना गर्नु पर्ने भएपनि अधिकांस दल र सञ्चारमाध्यमहरुले पालना नगरेको भन्दै त्यसतर्फ सबैले ध्यान दिनुपर्ने बताउनुभयो ।
रामेछाप जिल्लामा ९६ मतदान स्थलका २२६ वटा मतदान केन्द्रबाट मतदान स्थलवाट १ लाख ८३ हजार ३ सय ९ जनाले मतदान गर्दै छन् ।