रामेछाप– निर्धारीत समयमा २२ औ वार्षिक साधारण सभा सकेको मन्थली साकोसले मंगलबार आफ्नो कार्यालयमा पत्रकार सम्मेलन कार्यक्रमको आयोजना गरी वार्षिक कामको समिक्षा गरेको छ । सहकारीले एक वर्षको अवधिमा संचालक समितिले संस्थागत विकास र शेयर सदस्यहरुका पक्षमा संस्थाले गरेका काम, आम्दानी तथा खर्चको अवस्था र भावी कार्य योजनाका बारेमा जानकारी गराएको हो । मन्थली बचतले गत साधारण सभाबाट प्राप्त म्यानडेट र संचालक समितिले तय गरेको पूर्व निर्धारित पात्रो अनुसार गरेको कामका बारेमा संस्थाका सचिव गोविन्द घिमिरे जानकारी गराउनु भएको थियो ।
तमाकोशि सेवा समितिमा कार्यरत तत्कालीन ११ जना अगुवाहरुले थोरै रकम बचत गरि सुरु गरेको उक्त संस्थामा हाल १२ हजार आठ सय ५३ को सदस्य रहेका छन् । ११ हजार पुँजीबाट बचत तथा ऋण लगानी मार्फत आर्थिक तथा सहकारी विकासको अभियानमा जुटेको सहकारीले हाल सम्म आफ्ना सदस्यहरुको आर्थिक तथा सामाजिक विकासको क्षेत्रमा निकै ठुलो योगदान पुर्याएको र यसले जिल्लाको सहकारी आन्दोलनमा अग्रणि भूमिका निर्वाह गर्दे आएको पनि सचिव घिमिरेले जानकारी गराउनुभयो ।
साकोसले रामेछाप र मन्थली नगरपालीकाका १६ वटा वडालाई आफ्नो कार्यक्षेत्रको रुपमा काम गर्दे आएको र आगामि दिनमा दुबै नगरपालिकाका सबै वडामा कार्यक्रम लैजाने तयारी गरी रहेको जानकारी पनि पत्रकार सम्मेलनमा गराईएको थियो । गत बर्षको ९६औ अन्तराष्ट्रिय सहकारी दिबस तथा २५ औ राष्ट्रिय सहकारी दिबको अबसरमा राष्ट्रिय सहकारी महासंघ लि बाट ३ नं प्रदेशको उत्कृष्ठ सहकारीका रुपमा सम्मान र पुरस्कार प्राप्त गरेको र गत आर्थिक वर्षमा नै भारतको हिमाञ्चल प्रदेशको सहकारीबाट अन्तराष्ट्रिय स्तरको सहकारी पुरस्कार प्राप्त गरे पछिका दिनमा संस्थाले थप जिम्मेवारी वोध गरेर उत्साहवद्र्धक तरिकाले काम गरि रहेको सचिब घिमिरेले बताउनुभयो । त्यस्तै सदस्यहरुको सहजतालाई ध्यानमा राखेर आइ एम ई सेवा, एटी एम सेवा, लगायतका विभिन्न प्रविधि युक्त सेवा ल्याउने तयारीमा गरी सहकारी लागी परेको बताउनुभयो ।
त्यसै गरि साकोसले गत आर्थिक बर्ष २०७५÷७६ मा कुल सम्पत्ति ८० करोड ४० लाख ७१ हजार १ सय दुइ रुपैयाँ रहेको, ५८ करोड ३९ लाख ७ हजार ३ सय सैतीस रुपैयाँ ऋण लगानी भएको, ६२ करोड ७९ लाख ४४ हजार १ सय चवालिस रुपैयाँ बचत संकलन भएको र ७ करोड १ लाख १९ हजार रुपैया शेयर पुँजी संकलन गरेको छ । पत्रकार सम्मेलनमा संस्थाका अध्यक्ष ध्रुब प्रसाद सुवेदीले संस्थाको काम र काम प्रतिको सरोकारीको मुल्यंकनले संस्थालाई उत्साहित गराएको भन्दै भविष्यमा संस्थाको विकासमा आफुहरुले कुनै पनि कसुर नराख्ने प्रतिवद्धता व्यक्त गर्नु भएको छ ।
पत्रकार सम्मेलनमा यस अघि संस्थाको २२ औं वार्षिक साधरण सभाबाट सम्मानित हुनुभएका पत्रकार दीपक भट्लाई संस्थाका अध्यक्ष ध्रुब प्रसाद सुवेदीले नगद ५ हजार, ढाकाको खादा र सम्मान पत्रद्धारा सम्मान गर्नुभएको छ ।
यो बारेमा तपाईको प्रतिकृया