अनुगमन टोलि पुग्दा शिरसे र ढाँडेका अधिकांश पसल बन्द

रामेछाप । शुक्रबार बजार अनुगमनका लागि जिल्लाको अनुगमन टोली पुग्दा सिरसे र ढाँडे बजारका सबैजसो पसलहरु बन्द भएका थिए । बजारका पसल तथा होटलहरुको प्रकृयागत संचालन प्रकृया अनि ब्यापारी र उपभोक्ताहरुमा सचेतिकरण र शुद्धिकरणको अवस्थाको बारेमा समेत बुझन शुक्रबार घरेलु अधिकृत मेघराज गौतमको नेतृत्वमा आकस्मिक अनुगमनका लागि टोली ति बजारहरुमा पुगेको थियो ।
अन्य दिन पनि प्राय खुल्लानै रहने र शुक्रबार विहानभर पनि प्राय खुल्लानै रहेका अधिकांश पसलहरु दिउँसो १० बजेपछि भने प्राय बन्द गरिएका थिए । टोली ११ बजे सिरसे पुगेको थियो । टोलि बजारमा पुग्दा सबैजसो पसलहरु प्राय बन्द थिए । स्थानिय उपभोक्ताहरुका अनुसार – भुगोलको हिसाबले जिल्लाबाट टाढा र दुर्गम ठाउँ भएको र राज्यको उपस्थीति न्युन मात्रामा हुने हुँदा ब्यापारीहरुका लागि यहाँका बजार सुरक्षित पनि मानिन्छ । राज्यको उपस्थिति कमहुने यि बजारहरुमा अनुगमनका लागि टोली आउने कुराको सुचना ब्यापारीहरुले विहिबार बेलुकानै जानकारी पाईसकेका थिए ।
गत वर्ष अनुगमनका लगि पुगेको टोलीले सिरसे बजारमा भारि मात्रमा म्याद नाघेका सामाग्रि जफत गरेको थियो । जसका कारण ब्यापारीहरु अनुगमन टोलिको बारेमा सचेत थिए ।सोहि सुचनाका आधारमा आफुहरुले पसल बन्द गरेर हिडेको स्थानिय पौडेल थरका एक ब्यापारीले जानकारी दिनुभयो ।

दुर्गम भुगोलका कारण यहाँका अधिकांश पसलहरुमा म्याद नाघेका र ननाघेका सामाग्रिहरुको पर्वाहनै नगरि विक्रि गर्ने प्रचलन रहेको छ । उपभोक्ताहरुले पनि त्यसको कुनै पनि पर्वाह गर्दैनन् । यस खालको प्रचलनले यहाँका पसलहरुलाई ब्यापार गर्न निकै सन्चो बनाएको छ ।
कतिपय पसल बन्द हुनुमा खेतिको मौसम पनि भएको र कतिपयले नियतबसनै पसल बन्द गरेर हिडेको रामेछाप उद्योग वाणिज्य संघ रामेछापका उपाध्यक्ष समेत रहेका अनुगमन टोलीका सदस्य दामोदर थापाले पनि स्वीकार्नु भयो । तर यसलाई ब्यापारीहरुले पनि सकरात्मक रुपमा बुझनु जरुरी भएको थापाको भनाई रहेको छ ।
आफुले नियतबस रुपमा नराखेको भएपनि संभावित म्याद नाघेका सामाग्रिको जफत र कानूनि झन्झटबाट मुक्ति पाउन पनि कतिपय ब्यापारीहरुले टोली आउने सुचनाका आधारमा पसल बन्द गराउनु परेको अर्का एक ब्यापारीले आफनो नाम उल्लेख नगर्ने सर्तमा स्वीकार गरे ।
ओखलढुंगाको सिमाना स्थित लिखु किनारमा रहेका जिल्लाको लिखु तामाकोशि गाउँपालीका वडा नं २ मा पर्ने ति दुवै बजारमा गरि करिब ३ दर्जन भन्दा बढि पसल र होटलहरु रहेका छन् । जसमध्य अनुगमन टोलीले सिरसेका औषधि मोवायल लगायतका विभिन्न आधा दर्जन पसल मात्र अनुगमन गरेको थियो ।
त्यस बाहेक टोलीले धोवि बजारका समेत दुई दर्जन जति पसलहरुको अनुगमन गरेको थियो । अनुगमनका क्रममा केहि पसलहरुबाट म्याद नाघेका खाद्यन्न सामाग्रि समेत जफत गरेको थियो भने कतिपयलाई पसल दर्ता गराएर संचालन गर्नका लागि सचेत गराईएको टोलीका संयोजक उद्योग अधिकृत मेघराज गौतमले बताउनु भयो ।