रामेछाप- सदरमुकाम मन्थलीका ४ जना मासु पसलका संचालकलाई प्रहरीले पक्राउ गरेको छ । मन्थली नगरपालिकाले सोमबार गरेको बजार अनुगमनका क्रममा पसलमा बिक्रीका लागि राखिएको अस्वस्थ सडेको मासु बरामद गरेको विषयमा मन्थलीका चार वटा मासु पसलका संचालकलाई बुधबार प्रहरीले पक्राउ गरेको हो ।
पक्राउ पर्नेमा मन्थली नगरपालिका नजिकै मासु पसल गर्ने न्यू फेमस कोल्ड स्टोर मन्थलीका संचालक राजु खड्गी, रेडक्रस भवनमा रहेका दुई वटा मासु पसलहरु क्रमसः मन्थली कोल्ड स्टोरका पशुपती साहि र रेसम मासु पसलका संचालक उमेश साहि रहेका छन् । त्यस्तै बसपार्क नजिकै सावित्रा कोल्ड स्टोर मन्थलीका संचालक मखौरे माझी पनि पक्राउ परेका छन् । उनिहरुले आफ्नो पसलमा अस्वस्थकर मासु विक्रिको लागि राखेको बजार अनुगमनका लागि खटिएको टोलीले फेला पारेपछि थप अनुसन्धानका लागि पक्राउ गरिएको प्रमुख जिल्ला अधिकारी रुद्रादेवी शर्माले बताउनुभयो ।
मन्थलीमा हुने गरेको हरेक अनुगमनका क्रममा अस्वस्थकर मासु र विक्रिका लागि राखिएको, म्याद नाघेको सामाग्री पटक–पटक बरामद गरिएको र कतिपयलाई यस अघि पनि सचेत र जरिबाना गराउँदा पनि उनिहरुले आफ्नो गल्तीलाई सुधार नगरेको कारण थप अनुसन्धानका लागि पक्राउ गरिएको र अनुुसन्धान पछि मात्र बाँकी सजाएको बारेमा भन्न सकिने पनि प्रजिअको भनाई रहेको छ ।
कोरोनाको संभावित खतरा र त्यसको हल्लाले बजारमा हुन सक्ने कृतिम अभाबलाई न्यूनिकरण गर्न र बजारको अबस्थालाई अध्ययन गर्न मन्थली नगरपालिकाले जिल्ला प्रशासन कार्यालयसँगको समन्वयमा एकै पटक ४ वटा विषयगत क्षेत्रका विज्ञ सहितको अनुगमन टोली छुट्टा छुट्टै परिचालन गरेको थियो । सोहि टोलीले दिएको प्रतिबेदनका आधारमा चारवटा मासु पसलका संचालकहरु पक्राउ गरिएको बताईएको छ । त्यस बाहेक अन्य दोषी देखिएका पसल र होटलवालाको हकमा गर्ने कारबाहीका बारेमा पनि बुधबार बसेको बजार अनुगमन समितिको बैठकले टुंग्याएको छ । जसमा उनिहरुले गरेको कसुरका आधारमा सामान्य जरिवना गराएर सचेत गराउने सम्मको निर्णय भएको छ ।
यो बारेमा तपाईको प्रतिकृया