१ असोज, २०७६
रामेछाप- स्थानीय तहको निर्वाचन पछि जनप्रतिनिधिले आफूले पाउने सेवा बाहेक पनि विभिन्न शिर्षकमा थप सेवा सुविधा लिएको भन्दै आलोचना खेपी रहेको बेला रामेछापको मन्थली नगरपालिकाका एक जनप्रतिनिधिले आफूले पाउने रकम विद्यालयलाई दिनुभएको छ । मन्थली नगरपालिका वडा नम्बर ३ का वडा सदस्य नारायण बोगटीले आफ्नै वडा भित्र रहेका चार ओटा विद्यालयलाई चार महिनाको तलब बापतको रकम दिनुभएको हो ।
मन्थली नगरपालिकाको न्यायिक समितिका सदस्य समेत रहनुभएका बोगटीले विद्यालयमा अध्ययनरत विद्यार्थीको खेलकुद विकासमा सहयोग होस भन्ने उद्देश्यले प्रति विद्यालय ६ हजारका दरले आर्थिक सहयोग गरेको बताउनुभयो ।
उहाँले भन्नुभयो– ‘म राज्यले सेवा सुविधा दिन्छ भनेर चुनाव लडेको हैन्, हामीले राजनीति गरेको पनि समाज सेवाकै लागि हो । मैले पाउने थोरै सेवा सुविधाले कुनै व्यक्ति वा समूहको धेरै ठूलो समस्या टर्न सक्छ भने त्यसमा हामीले सहयोग गर्नुपर्छ भन्ने भावनाको विकास गराउन त्यो सहयोग गरेको हुँ ।, मैले सहयोग गरेको सानो रकमले त्यहाँ भएका बाल क्लबहरुले संचालन गर्ने खेलकुदमा थोरै भए पनि सहयोग पुग्ने छ ।’
बाल दिवसको अवसर पारेर वडा नम्बर ३ मा रहेका कालिकादेवी आधारभूत विद्यालय ठुलीमदौ, प्रावि अर्चले, गुञ्जेश्वरी प्रावि विर्ता र ठाँटी आधारभूत विद्यालयका विद्यार्थीलाई उक्त रकम दिएको हो । बोगटी २०७४ सालको स्थानीय तहको निर्वाचनमा मन्थली नगरपालिका वडा नम्बर ३ मा नेपाली काग्रेसको तर्फबाट निर्वाचित हुनुभएको हो ।
यो बारेमा तपाईको प्रतिकृया