करुण सिं बराइली, उमाकुण्ड- रामेछापको उमाकुण्ड गाउँपालिका वडा नं ३ कुबुकास्थलीमा प्रवाह भईरहेका सार्वजनिक सेवा तथा विकास निर्माणको बारेमा सार्वजनिक सुनुवाई भएको छ । वडामा प्रवाह भईरहेका सेवाको पारदर्शिता र शुसासनलाई कायम राख्नको लागि वडामा कार्यरत गैर सरकारी संस्था देखि स्थानीय सरकार, प्रदेश सरकार र संघिय सरकारले गरेका कामको बारेमा मंगलबार सार्वजनिक सुनुवाई मार्फत कामको प्रगतिसँगै आर्थिक प्रतिवेदन सार्वजनिक गरिएको हो ।
वडा कार्यालयमा गरिएको सार्वजनिक सुनुवाईमा वडा कार्यालयबाट प्रवाह भएका सेवा, वडा भित्र रहेका विद्यालयको प्रगति, वडामा स्वास्थ्य विमाको अवस्था, गैरसरकारी संघसंस्थाले गरेको काम, वडामा संचालित हाइड्रोपावरको काम लगायतको विषयमा सम्बन्धित निकायका प्रमुख एवं प्रतिनिधिले प्रस्तुतीकरण गरेका छन् ।
प्रस्तुतीकरणपछि स्थानीयले सम्बन्धित निकायका प्रमुख एवं प्रतिनिधिलाई प्रश्न गरेका छन् भने स्थानीयले सोधेका प्रश्नको जवाफ सम्बन्धित निकायका प्रमुख एवं प्रतिनिधिले दिएका छन् ।
स्थानीय नागरिककै लागि ल्याईएका सेवा तथा विकास निर्माणका कामलाई नागरिक माझ प्रस्तुत गर्दा आर्थिक कारोबारमा पारदर्शिता हुनुको साथै स्थानीय सरकारलाई काम गर्न थप मार्गनिर्देश हुने वडा नं ३ का वडाध्यक्ष रमेश कुमार सुनुवारले बताउनुभयो । सार्वजनिक सुनुवाईमा आएका सुझावलाई ध्यान दिदैँ आगामी दिनमा नागरिकका थप अपेक्षा सम्बोधन हुने गरि सेवा प्रवाह र विकास निर्माणको काम गरिने वडाध्यक्ष सुनुवारले प्रतिबद्धता व्यक्त गर्नुभयो ।
वडाध्यक्ष रमेश कुमार सुनुवारको अध्यक्षतामा भएको सार्वजनिक सुनुवाई कार्यक्रममा राजनीतिक दलका प्रतिनिधि, बुद्धीजिवी, शिक्षक, स्थानीय नागरिक लगायतको सहभागिता रहेको थियो । कार्यक्रममा चालु आर्थिक वर्षको ६ महिनामा वडाबाट प्रवाह भएका सेवा र विकास निर्माणका कामको बारेमा जानकारी गराईएको छ ।
यो बारेमा तपाईको प्रतिकृया