उमाकुण्ड गाउँपालिकाले पत्रकार सम्मेलन गर्दे भन्यो हाइड्रो पावरको ज्यादति खप्न सकिएन्

रामेछाप १८ फाल्गुण । जिल्लाको उमाकुण्ड गाउँपालिकाले पत्रकार सम्मेलनको आयोजना गरि पालिका भित्र भए गरेका विकास निर्माण लगाएत विभिन्न कामको बारेमा जानकारी गराएको छ । पालिकाले आफनै सभाहलमा जिल्लाका पत्रकार हरुको रोहबरमा सम्पन्न भएका कार्यक्रम र भावि कार्य दिसाको बारेमा जानकारी गराएको हो ।
पत्रकार सम्मेलनका अबसरमा पालिकाका अध्यक्ष शेर बहादुर सुनुवारले सम्बृद्ध पालिका र सुःखि नागरिकको लागि पालिका भित्रका हाईड्रोपावरको दादागिरी बाधक रहेको बताउनु भयो । अध्यक्ष सुनुवारले पछिल्लो उदाहरणका रुपमा एक हप्ता अघि ‘दुगड् हाइड्रो पावरमा घटेको घटनाले पीडित पक्षको मात्र नभएर सिङ्गो पालिकालाईनै मर्माहत बनाएको बताउनु भयो । दुगडको लापरबाहिले एक जना मज्दुरको ज्यान जानुका साथै २८ दिने शिशुसहितको परिवार विचल्लीमा परेको भन्दै ‘दुगड् हाइड्रो’ पावरको काम प्रति आक्रोश पोख्नु भयो ।

उहाँले भन्नुभयो ‘दुगड् हाइड्रो’ पावरको मात्र नभएर पालिकामा संचालित अन्य हाईड्रोपावरले पनि स्थानियहरुलाई पेलेर काम गरेको गुनासो गर्नु भयो । उनिहरुले स्थानिय प्रशासन र सर्बदलिय सहमतिका आधारमा गरेको लिखित प्रतिबद्धता पनि पुरा नगरि आफनो स्वार्थ अनुकुल काम गरेको भन्दै उनिहरुको दादागिरी स्थानिय सरकारका लागि पनि सह्य नहुने बताउनु भयो ।
रामेछाप र सोलुखुम्बुको सीमा भएर बहने लिखु नदीमा निर्माणाधीन र निर्माण सम्पन्न भएका नौ जलविद्युत आयोजना रहेका र उनिहरु कसैले पनि आफनो प्रतिबद्धता अनुसार काम नगर्दा स्थानियहरु मर्कामा परेको पनि अध्यक्ष सुनुवारले बताउनु भयो । यस खालको रबैया विरुद्ध आफुहरुले चाँडैनै अभियान संचालन गर्ने जानकारी पनि अध्यक्ष सुनुवारले गराउनु भयो ।
त्यसैगरि पत्रकार सम्मेलनमा अध्यक्ष सुनुवारले आफुले गाउँपालिकाभित्र भइरहेका सडक लगायतका पूर्वाधार विकासको कामका लागि हुनुपर्ने दिगोपना र गुणस्तरीयतामा कुनै पनि सम्झौता नगर्ने भन्दै यसका लागि स्वतन्त्र ढंगले अनगमन गरी दिनका लागि पनि सम्बन्धित पक्ष संग आग्रह गर्नु भयो । उहाँले भन्नु भयो पालिकाको काममा निति बाहिर बसेर कुनै पनि सम्झौता हुँदैन् ।
केहि दिन अघि मात्र गाउँपालिकाको मध्यमार्गी सडक अन्र्तगतको ४ करोड रुपियाँको ठेक्का संझौता हुनु पालिकाका लागि पनि गर्वको विषय भएको भन्दै उक्त योजनाका लागि पालिकाले काम हेर्नका लागि छुट्टै अनुगमन समिति बनाइएको बताउनुभयो । गाउँपालिकाले स्थानिय हरुका मागमा आधारमा सडक पूर्वाधार विकासका काममा जोड दिंदै आएको पनि सो अबसरमा जानकारी गराईएको थियो ।
त्यस्तै सदरमुकाम मन्थलीबाट गाउँपालिकाको केन्द्रसम्म जोड्ने सडक कालोपत्रे गर्ने सुनिश्चितता भइसकेको जानकारी पनि सनुवारले गराउँनु भयो । जस अन्तरगत यही चैत मसान्तसम्म साढे ६ किलोमिटर सडक कालोपत्रे भइसक्ने र बाँकी सडक आगामी आर्थिक वर्षमा कालोपत्रे हुने उहाँको भनाइ छ । गाउँपालिकाको भुजिदेखी गुम्देलसम्मका नागरिकलाई गाउँपालिकाको केन्द्रमा सहज रूपमा आवत–जावतका लागि गाउँपालिकाले ७२ किलोमिटर मध्यमार्गी सडक बनाएको र यसको दिगो विकासका लागि पनि सरकारले आवश्यक सोच बनाई रहेको उहाँले बताउनुभयो ।
पत्रकार सम्मेलनमा आफनो धारणा राख्दै उमाकुण्ड गाउँपालिकाकी उपाध्यक्ष सावित्री सुनुवारले यस बर्ष गाउँपालिकामा सञ्चालन हुने २ सय भन्दा बढी विकास योजनाहरू रहेको र हाल सम्म उनिहरु मध्य एक सय वटा योजना सम्पन्न भईसकेको बताउनुभयो । चालु आर्थिक वर्ष २०७९÷०८० मा ७ वटा वडामा अहिले सम्म १ सय वटा योजनाहरू सम्पन्न भई सकेको र तिनको भुक्तानीका लागि माग भई आएको छ । जसमा २ करोड ९१ लख रुपियाँ भुक्तानीका लागि सिफारिस भइसकेको पनि उपाध्यक्ष सुनुवारले बताउनुभयो । गाउँपालिकाको सबै वडाहरूमा सञ्चालन हुने योजना तथा कार्यक्रमहरूलाई पारदर्शी, गुणस्तरीयता र समयमै सम्पन्न गराउनका लागि अनुगमनमा कडाइ गरिएको उहाँले बताउनुभयो ।
प्राविधिक सहितको अनुगमन समितिले अनुगमनका क्रममा केही योजनाहरूमा गुणस्तरहीन काम भएको पाइएकाले त्यस्ता योजनाहरूलाई सुधार गर्नु पर्ने वाचा सहित आवश्यक सुझावहरू दिइएको जानकारी पनि पत्रकार सम्मेलनमा उपाध्यक्ष सुनुवारले गराउनु भयो ।