दोरम्बा शैलुङमा मरेकालाई पनि सामाजिक सुरक्षा भत्ता

रामेछाप ५ वैशाख । रामेछापको दोरम्बा शैलुङ गाउँपालिकाले आफना स्वर्गबासी जेष्ठ सदस्यहरुलाई पनि सामाजिक सुरक्षा भत्ता दिएको पाईएको छ । महालेखापरीक्षकको कार्यालयले भर्खरै सार्वजनिक गरेको लेखा परीक्षणको प्रतवेदनमा उक्त गाउँपालिकाका कतिपय वडाले मरेका नागरिकहरुलाई पनि सामाजिक सुरक्षा भत्ता दिंदै आएको कुराको खुलेको हो ।
कानून त सामाजिक सुरक्षा भत्ता पाउने व्यक्तिको मृत्यु भएमा वा त्यस्तो व्यक्ति सामाजिक सुरक्षा भत्ता पाउन योग्य नभएमा निजको नाम सामाजिक सुरक्षा भत्ता पाउने व्यक्तिको नाम अभिलेखबाट हटाउनु पर्ने उल्लेख गरिएको छ । तर महालेखा परिक्षकले लोखापरीक्षको क्रममा वडा नम्बर ३ र वडा नम्बर ७ को मृत्यु दर्ताको अभिलेख र वडा नम्बर २ को लगत कट्टाको अभिलेख परीक्षण गर्दा मृत्यु भइसकेका लाभग्राहीको नाममा मृत्युपछि पनि निजको परिवारका सदस्यहरुले सामाजिक सुरक्षा भत्ता नियमित रुपमा बुझदै आएको पाईएपछि उक्त घटना बाहिरिएको हो ।
उक्त विवरणका आधारमा महालेखापरीक्षको कार्यालय मरेको मिति भन्दा पछि कसैलाई पनि सामाजिक भत्ता दिन नमिल्ने भएकोले सम्बन्धित पक्ष संग उक्त रकम असुल उपर गरी संघीय संचित कोषमा दाखिला गर्नुपर्ने कुरा पनि उल्लेख गरेको छ ।
यस बारेमा पालिकाका सूचना तथा संचार प्रविधि अधिकृत उज्वल पाठक संग सम्पर्क गर्दा उहाँले गत बर्ष वडा सचिब पनि नयाँ भएको र सामाजिक सूरक्षा भत्ता वितरणका क्रममा केहि कम्जोरि हुन जाँदा कार्यालयले केहि ब्यक्तिको लगत कट्टा गराउन छुटाए वापत त्यसो भएको र भत्ता बुझे संगै सरोकारवाला ब्यक्तीले मृत्यु दर्ताको प्रकृया पुरा गरिसकेको पनि जानकारी दिनु भयो ।