मन्थली नगरद्वारा बालमैत्री स्थानीय शासन लागु गर्ने तयारी 

  रामेछाप ,१६ वैशाख ।   मन्थली नगरपालिकाले आगामी एक वर्ष भित्र बालमैत्री स्थानीय शासन लागू गर्ने तयारी गरेको छ । स्थानीय शासन नियमावली अनुसार नगर कार्यपालिकाको बैठकले गरेको निर्णयका आधारमा नगरपालिकालाई २०८१ जेठ मसान्तसम्म बालमैत्री नगर घोषणा गर्नका लागि उसले आवश्यक तयारीलाई अगाडि बढाएको हो ।
त्यसका लागि नगरका सबै वडाहरूमा सहजकर्ताहरू परिचालन गरी सकिएको मन्थली नगरपालिकाले जानकारी गराएको छ । त्यसका लागि नगरले भर्खरै सहकर्ता नियुक्ति गरी उनीहरूलाई क्षमता विकास तालीम प्रदान गरी वडामा खटाई सकिएको छ ।
जसका लागि सहजकर्ताहरूले वडा समिति गठन लगायत बालमैत्री स्थानीय शासन लागू गर्न सरकारले निर्धारण गरेको सूचक प्राप्तिका लागि घर घरमा पुगेर काम गर्नु पर्ने । सामाजिक परिचालन उपशाखाकी निरीक्षक भगवती तामाङले जानकारी गराइन् ।
नगरपालिकाले ‘बालमैत्री स्थानीय शासन लागू गर्नका लागि चालू आव २०७९÷०८० मा नगरपालिकाले १५ लाख रुपियाँ बजेट विनियोजन गरेर काम थालनी गरेको र उनीहरूलाई निश्चित कार्यविधिका आधारमा १४ वटै वडामा खटाइएको मन्थली नगरपालिका प्रमुख लव श्रेष्ठले बताए ।
उक्त प्रयोजन अन्तर्गत नगरपालिकाको सबै वडामा बाल क्लब गठन, बाल सञ्जाल गठन, घरधुरी सर्वेक्षण, बालमैत्री विद्यालयको व्यवस्था सहित सरकारले निर्धारण गरेको ५१ वटा सूचक प्राप्तिका लागि काम गरिरहेको पनि प्रमुख श्रेष्ठले जानकारी गराए । उनले भने उक्त प्रयोजनका लागि आवश्यक परे थप बजेटको व्यवस्थापन नगरलेनै गर्ने पनि प्रमुख श्रेष्ठको भनाई रहेको छ ।