रामेछाप नगरको चालु ९ महिनाको आम्दानी ६४ प्रतिशत

रामेछाप २० बैशाख । आन्तरिक आम्दानीको हिसाबले पछाडि रहेको रामेछाप नगरपालिकाकाले विगत ९ महिनामा चालु आर्थिक वर्षको ९ महिनामा ५४ लाख रुपियाँ राजश्व सङ्कलन गर्न सफल भएको छ । आर्थिक वर्ष २०७९÷०८० मा एक करोड ८ लाख ८० हजार रुपैयाँ राजश्व सङ्कलन गर्ने लक्ष्य लिएको उक्त नगरले गत साउन देखि चैत मसान्त सम्ममा उक्त राजस्व संकलन गरेको हो ।
जस अनुुसार उसले लक्ष्यको ४९ दशमलव ६४ प्रतिशत गरि ५४ लाख ६ सय ४३ रुपैयाँ मात्र राजश्व सङ्कलन गर्न सफल भएको रामेछाप नगरपालिकाले जनाएको छ । नगरका कुल ९ वटा वडा मध्य सबै भन्दा बढी वडा नं ७ बाट ४ लाख ५२ हजार ४ सय ६४ रुपैयाँ राजश्व सङ्कलन गरेको छ भने सबै भन्दा कम वडा नं १को गोठगाउँबाट कुल एक लाख ८२ हजार २सय ३ रुपैयाँ राजस्व असुली भएको छ ।
त्यसैगरी वडा नं २ बाट दुई लाख १३ हजार ८ सय, वडा नं ३ बाट ३ लाख १७ हजार २ सय ९८ रुपैयाँ राजश्व सङ्कलन गरेको छ । त्यसैगरी वडा नं ४ बाट तीन लाख ६८ हजार ३ सय ३८ रुपैयाँ संकलन गरेको छ । त्यस्तै वडा नं ५ बाट दुई लाख ८३ हजार ५सय ९५, वडा नं ६ बाट एक लाख ८७ हजार ८सय, वडा नं ८ बाट दुई लाख ५५ हजार ७सय ४१ र वडा नं ९ बाट दुई लाख १६ हजार ७ सय ५ रुपैयाँ समेत गरि उक्त राजश्व सङ्कलन भएको पनि नगरपालिकाको लेखाशाखाले जनाएको छ ।
त्यस बाहेक रामेछाप नगरपालिकाको राजश्व शाखाबाट २९ लाख २२ हजार ५ सय ९८ रुपैयाँ राजश्व सङ्कलन भएको छ । त्यसैगरि रामेछाप नगरले यो अवधिमा चालु र पुँजीगत खर्च समेत गरी जम्मा ५० दशमलव ४२ प्रतिशत प्रगति हासिल गरेको छ । चालु आर्थिक वर्ष २०७९÷०८० मा नगरपालिकाले चालु तर्फ ४७ करोड, १६ लाख ८ हजार ४४१ रुपियाँ विनियोजन गरेकोमा गएको चैत महिना भरिमा कुल ५७ दशमलव ७६ प्रतिशत अर्थात् २७ करोड ७१ लाख २६ हजार ८सय ६१ रुपैयाँ खर्च भएको जानकारी पनि गराएको छ । जसमा पुँजीगत तर्फ ३१ करोड १२ लाख ५५ हजार ५सय ५८ रुपैयाँ विनियोजन गरेकोमा ३७ दशमलव ७९ प्रतिशत अर्थात् ११ करोड ७६ लाख ११ हजार रुपैयाँ मात्रै खर्च भएको र लक्षित अनुसारको प्रगति भने हुन नसकेको पनि नगरपालिकाका लेखा अधिकृत मदन सुवेदीले जानकारी दिनुभयो ।