रामेछाप प्रशासनले विदाका दिन पनि नागरिकता, राहदानी र राष्ट्रिय परिचय पत्रको कामलाई निरन्तरता दिने

रामेछाप । जिल्ला प्रशासन कार्यालय रामेछापले आफना सेवाग्राहीहरुका लागि सार्वजनिक बिदामा पनि आफनो सेवालाई निरन्तरता दिने भएको छ । कार्यालयले बिहिवार एक सूचना प्रकाशित गरि भोली हुने सार्वजनिक विदाको दिन र बर्ष भरिका अरु सार्वजनिक विदाकोे दिनहरुमा पनि कार्यालय ३ वटा सेवालाई भने सुचारु गर्ने जनाएको हो ।
जिल्ला प्रशासनले २०७९ चैत २ गते नेपाल राजपत्रमा प्रकाशित नेपाल सरकार गृह मन्त्रालयको सूचना अनुसार २०८० साल वैशाख १ गते देखि विभिन्न सार्वजनिक बिदाका दिनमा समेत नागरिकता, राहदानी र राष्ट्रिय परिचयपत्र सहित ३ वटा सेवालाई सार्वजनिक विदाका दिन पनि निरन्तरता दिने भन्दै सम्बन्धित सरोकारवाला हरुका लागि उक्त सूचना प्रकाशित गरेको कार्यालयले जनाएको छ ।
प्रशासनले २०७९ चैत २ गते नेपाल राजपत्रमा प्रकाशित नेपाल सरकार गृह मन्त्रालयको सूचनाको हवला दिंदै २०८० साल वैशाख १ गते देखि उँधौली पर्व–चण्डी पूर्णिमा , वैशाख पूर्णिमा, रक्षा बन्धन, श्रीकृष्ण जन्माष्टमी, घटस्थापना, क्रिसमस डे, योमरी पुन्हि–ज्यापू दिवस,धान्य पूर्णिमा, लगायतका सार्वजनिक बिदाका दिनमा समेत सेवा प्रवाह जानकारी गराएको छ । त्यसै गरी तमु ल्होसार, माघी पर्व,माघे सङ्क्रान्ति,, सोनाम ल्होसार, महाशिवरात्रि, ग्याल्पो ल्होसार, इद,इद उल, फिद, बकर इद,अजाह, गणतन्त्र दिवस, जन युद्ध दिवस, राष्ट्रिय प्रजातन्त्र दिवस, अन्तर्राष्ट्रिय महिला दिवस, बुद्ध जयन्ती र पृथ्वी जयन्ती लगायतका सार्वजनिक बिदाका दिनहरुमा ३ वटै सेवालाई निरन्तरता दिने पनि प्रशासन कार्यालय जनाएको छ ।