रामेछाप । सदरमुकाम मन्थलीमा क्रियाशील रहेको नवजागरण बचत तथा ऋण सहकारी संस्थाले आफ्नो २५ औ स्थापना दिवसको अवसर पारेर रजत जयन्ती मनाएको छ । उसले आफ्नो जन्म स्थल मन्थली नगरपालिका २ टेकनपुरमा पुगेर स्थानीयहरूको रोहवरमा स्थापना दिवस मनाएको हो ।
मन्थली नगरपालिका–२ का वडाध्यक्ष सुरेन्द्र कार्कीको प्रमुख आतिथ्यता र सहकारी संस्थाका अध्यक्ष श्याम थापाको अध्यक्षतामा शुक्रवार उसले त्यहाँ अध्ययनरत विद्यार्थीलाई शैक्षिक सामाग्री वितरण गर्नुका साथै हाल सम्मको संस्थाको गतिविधि र अवस्थाको बारेमा पनि जानकारी गराएको थियो ।
सो अवसरमा संस्थाले प्रमुख अतिथिको हातबाट सो वडाका दुई वटा विद्यालयहरू तम्राकौशिका र बालकन्या आधारभूत विद्यालयका शिशु कक्षा देखि कक्षा ८ सम्म पढ्ने ७७ जना विद्यार्थीहरूका लागि विद्यालय झोला, कपि लगायतका स्टेस्नरि सामाग्री वितरण गरेको थियो।
२०५५ सालमा समाजका मन मिल्ने २५ जना संस्थापकहरुले सुरु गरेको सो सहकारी संस्थाले हाल ४ करोड ७६ लाख ८३ हजार शेयर पुँजी सङ्कलन गर्न सफन भएको छ । सहकारीको सात सिद्धान्तको आधार र सहकारीको निति विधि र पद्धतिलाई आत्मासात गर्दे अघि बढेको उक्त संस्थाको सम्पत्ति हाल ६६ करोड नाघेको पनि सो अवसरमा
जानकारी गराइएको थियो ।
अहिले संस्थाले ५० करोड बढी बचत सङ्कलन गरेको छ भने उसले आफ्ना शेयर सदस्यहरूका लागि४० करोड भन्दा बढी ऋण लगानी गरेको छ । संस्थाको जगेडा कोषमा ६ करोड बढी रकम रहेको छ । त्यसैगरि संस्थाको संस्थागत विकासका लागि ९ हजार बढी शेयर सदस्यहरू आबद्ध भकाएछन् । सहकारीले एक वर्षको बिचमा सबै खर्च कटाएर १ करोड २५ लाख भन्दा बढी नाफा कमाएको संस्थाका व्यवस्थापक रमेश उदासले जानकारी दिनुभयो ।
कार्यक्रममा मन्थली नगरपालिका–१ का वडाध्यक्ष होमप्रसाद पौडेल, सहकारीका पदाधिकारी तथा सदस्यहरू, तथा स्थानीयहरूको समेत उल्लेखनीय सहभागिता रहेको उक्त कार्यक्रमका अवसरमा संस्थाका पूर्व अध्यक्ष झम्क बहादुर कार्कीलाई पनि सम्मानित गरिएको थियो ।
यो बारेमा तपाईको प्रतिकृया