रामेछाप १५ साउन । देशभरका कृषकहरूका लागि मकैको सिजनमा युरिया मलको हाहाकार भइरहेको बेला रामेछाप नगरपालिका वडा नं ७ ले भने आफ्ना वडाका कृषकहरूलाई निःशुल्क रूपमा युरिया मल वितरण गरेको छ । उसले आफ्नो वडाको मकै खेतीलाई लक्षित गरी उनीहरूबाट आएको मागका आधारमा यो सिजनमा मात्र कुल ७ सय ५० बोरा मल निःशुल्क रूपमा वितरण गरेको हो ।
वडा भित्र रहेका कृषकहरूलाई आवश्यक मलको लागि वडा कार्यालयमा सम्पर्क गर्न सूचना गरिएको र सोही सूचनाका आधारमा सम्पर्कमा आएका कृषकहरूलाई कार्यालयले टोल टोलमानै पुगेर निःशुल्क रूपमा मलको व्यवस्था गरेको रामेछाप नगरपालिकाका प्रवक्ता समेत रहनु भएका वडा अध्यक्ष समीर कार्कीले बताउनु भयो ।
त्यसैगरि अहिलेको धानबालिको लागि पनि वडा कार्यालयले निःशुल्क मल उपलब्ध गराउने तयारी गरी रहेको पनि अध्यक्ष कार्कीले जानकारी दिनुभयो । वहाँका अनुसार हामीले धानको लागि आवश्यकताका आधारमा मलको कोटाको लागि वडा कार्यालयमा सम्पर्क गर्न पनि भनेका छौ । सोही आधारमा मलको व्यवस्थापन गर्न लागिएको पनि कार्कीको भनाई रहेको छ ।
कार्कीका अनुसार हरेक नयाँ कुरा र सम्बृद्धिको सुरुवात गाउँबाटै सुरु गर्नु पर्छ भन्ने मान्यताका साथ यस अघि पनि वडाले सकभर नागरिकको सरोकार सँग जोडिएका सवालहरूलाई ध्यान दिँदै आएको र सोही योजना अनुरूप धानको सिजनमा पनि कुषकहरुका लागि निशूल्क रूपमा मल वितरण गर्न लागिएको हो ।
बेला बेलामा नयाँ काम गरेर चर्चामा आउनु भएका रामेछाप नगरपालिकाका प्रवक्ता समेत रहनु भएका वडा अध्यक्ष समीर कार्कीले हाल सम्म वडा बासीहरूका लागि स्वच्छ खानेपानी र करेसाबारी सिँचाइ गराउने उद्देश्यका लागि प्रतिघर एक हिल टेक वितरण,निशूल्क स्वास्थ्य बिमा लगायतका आधा दर्जन भन्दा बढी कामलाई पनि निरन्तरता दिएको छ भने सामाजिक सुरक्षा अन्तर्गत आफ्ना वडाका ज्येष्ठ नागरिक,अपाङ्ग,एकल महिला र अल्प सङ्ख्यक जातिका रूपमा परिचित हायु हरूका लागि घर घरमै बैङ्क सेवा पुर्याएर भत्ता वितरण गर्ने व्यवस्था पनि मिलाउँदै आएको छ ।
यो बारेमा तपाईको प्रतिकृया