रामेछाप ३२ साउन । मन्थली नगरपालिकाले बुधवार गरेको बजार अनुगमनका क्रममा जिल्ला समन्वय समितिकी सदस्यको पसलबाट म्याद नाघेका सामाग्री जफत गरेको छ । छड्के अनुगमनका क्रममा बुधवार दिउँसो मन्थली नपा ६ को सेले घाट बजारमा मन्थली नगरकी उप प्रमुख ईश्वरी बस्नेतको नेतृत्वमा पुगेको अनुगमन टोलीले जिल्ला समन्वय समिति रामेछापकी सदस्य अनिषा माझिकोे पसलबाट ८ थरी म्याद नाघेका सामाग्री जफत गरेको हो ।
पसलको अनुगमनका लागि नगरको टोली सेले घाट पुग्दा जिसस सदस्य मनीषा माझी आफै पसलमा रहनु भएको थियो । उहाँकै अनुमति लिएर पसलमा प्रवेश गरेको टोलीले ५सय एम यमको पेप्सी,आधा दर्जन बट्टा हर्लिक्स, रामेछाप किष्कुट गोल्डे न कुकिज,जिरा कुकिज,गोल्डन कुकिज,एप्लेक्स,र स्टिल नामको खाद्यपदार्थ समेत जफत गरेको थियो ।
बिहान मन्थली ६ को वेतिनी बजार बाट आफ्नो अनुगमन यात्रा सुरु गरेको टोलीले दिउँसो भलुवाजोरकै सिल्ली बजार,त्रिवेणी पुल,हत्तिटार,भलुवाखोला,कुनाउरी भैसिश्वर चोकका बजार केन्द्रका समेत करिब २ दर्जन पसल तथा होटेलको अनुगमन गरेको मन्थली नगरपालिका राजस्व शाखा प्रमुख उज्ज्वल पोखरेलले बताउनु भयो ।
नेपाल सरकार र स्थानीय सरकारले तय गरेको कार्यविधिका आधारमा सूक्ष्म तरिकाले गरिएको अनुगमनका क्रममा साना ठुला सबै जसोमा केही न केही कमजोरी भने भेटिएको थियो । अनुगमनका क्रममा व्यापारी हरूले जान अनजानमा भएका सबै खाले गल्ती हरूलाई पूर्ण रूपमा सच्याउने जानकारी गराएका थिए । नगरले गाउँमा पुगेर गरेको पहिलो अनुगमन भएकोले ब्यवसायीहरुलाई आइन्दा गल्ती नदोहोर्याउने सर्तमा कसैलाई पनि जरिवाना भने नगरिएको पनि पोखरेलले जानकारी दिनु भयो ।
अनुगमनका क्रममा म्याद नाघेका अखाद्य सामाग्री सबैको जफत गर्नुका साथै एक हप्ता भित्र दर्ता व्यवसाय नवीकरण गरि भएका कमजोरी नदोहोर्याइकन कानूनी दायरा भित्र अनिवार्य रूपमा आउनका लागि भने टोलीले कमजोरीका कारण सहितको लिखत पत्र थमाएको पनि राजस्व शाखा प्रमुख उज्ज्वल पोखरेलले बताउनु भयो ।
यस पटक मन्थली नगरले ग्रामीण बजार केन्द्रित अनुगमनलाई प्राथमिकतामा राखेर अनुगमन गरेको थियो । व्यापारीहरूको मन लाग्दी र हेलचेक्याईपनले उपभोक्ता आहत भएको सूचनाका आधारमा मन्थली नगरले अघिल्लो हप्ता वडा नं १३ को देवीटार र मिल्ती बजारका कुल ४० र वडा नं ४को सालुपाटि बजार र वडा नं ५ को सुनार पानी बजारका होटेल तथा पसलहरूको आकस्मिक अनुगमन गरेको थियो ।
अनुगमनका क्रममा सबै भन्दा बढी मदिराजन्य सामाग्रीहरू,दुई तीन वर्ष म्याद नाघिसकेका बियर,विभिन्न प्रजातिका जुस र पेय पदार्थ,चार वर्ष म्याद नाघेको सस देखि किरा परेका बिस्कुट लगायतका दर्जनौँ अखाद्य सामिग्रि जफत गरिएको थियो । अनुगमनका क्रममा व्यवसाय नवीकरण गर्न छुटेका व्यवसायी हरूको सुविधाका लागि स्थलगत रुपमानै नवीकरण गर्ने व्यवस्थापन नगरपालिकाले मिलाएको थियो ।
नीति विधि बुझाएर गरिएकोले सबै जसो व्यवसायीहरू नगरपालिका सँग खासै असन्तुष्टि भने नदेखिको अनुगमन टोली सँगै रहेका उद्योग वाणिज्य सङ्घ रामेछापका वाणिज्य उपाध्यक्ष सुदीस साहले जानकारी दिनु भयो । तर बरामद गरिएको सामान र म्याद सकिएको भन्ने बारेमा भने आफूहरू निर्दोष रहँदा रहँदै पनि क्षति बेहोर्नु परेको साना ब्यवसायीहरुको गुनासो भने रहेको उपाध्यक्ष शाहले बताउनु भयो ।
यो बारेमा तपाईको प्रतिकृया