रामेछाप २ भदौ । जिल्ला अस्पताल रामेछापबाट पाउने सबैजसो सेवा निःशुल्क भएको छ नेपाल सरकार बागमती प्रदेश सरकारले यही भदौ १ गते देखी लागु हुने गरी अस्पतालको जनरल बेड पनि बिरामीहरूका लागि निःशुल्क गरे सँगै अस्पतालबाट उपलब्ध अधिकांश सेवा निःशुल्क भएको हो ।
बागमती प्रदेश सरकार मातहत रहेको जिल्ला अस्पताल रामेछापको नयाँ भवन सहितको नयाँ संरचना थपिएका विज्ञ चिकित्सक सहितको जनशक्ति र सबै खाले श्रोत साधनले पुणर््ा भएसंगै अस्पतालको सबै सेवा लोभलाग्दो पनि भएको हो । २ जना विशेषज्ञ चिकित्सक सहित ११ जना डाक्टर रहेको उक्त अस्पताल श्रोत र साधनको हिसाबले पनि उत्तिकै भरपुर रहेको जिल्ला अस्पताल समितिका अध्यक्ष यम कुमार पाख्रिनले जानकारी दिनु भयो ।
उपचार प्रणाली र सेवामा आएको गुणस्तरका कारण दैनिक उपचारको लागि आउने सेवाग्राहीहरूको सङ्ख्यामा समेत वृद्धि भएको छ । जस अनुसार दैनिक १ सय देखि १ सय ३० जना बिरामीहरू उपचारको लागि अस्पतालमा आउने गरेका छन् ।
प्रदेश स्वास्थ्य मन्त्रालयले गरेको निर्णयको आधारमा भदौ १ गतेदेखि जनरल बेड सेवाग्राहीलाई निःशुल्क उपलब्ध गराउन थालेको जिल्ला अस्पतालले कोभिडको स्वास्थ्य परीक्षण,डेँगो रोग,टाई फाइट,मलेरिया,एस्क्रब सेवा,सर्किजल सहितको प्रसूति सेवा र सर्किजल सेवा, बिरामीहरूका लागि दिनहुँको खाना र जाख समेत निःशुल्क गर्दे आएको अस्पतालका एम डी जीपी डाक्टर मनोज कुमार यादवले बताउनु भयो । त्यस बाहेक प्रदेश सरकारले ल्याएको मुख्य मन्त्री सँग जनता कार्यक्रम अन्तर्गत हरेक हप्ता विशेषज्ञ सहितको मुख्य रोगहरूको विशेष परीक्षण र होल बडी सेवा समेत दिँदै आएको पनि डाक्टर यादवले बताउनु भयो । बाँकी उपचारको हकमा दैनिक स्वास्थ्य बिमा गरेकाहरूलाई पनि बिमा कार्डको आधारमा पनि अस्पतालले सेवा दिइरहेको छ । त्यस बाहेक अस्पतालले रामेछाप नगरपालिका सँगको सहकार्यमा रामेछाप नगरभित्रका बिरामीहरूका लागि निःशुल्क एम्बुलेन्स सेवाको पनि व्यवस्था गरेको छ ।
त्यसैगरि अस्पतालले छुट्टै सामाजिक सेवा ईकाई स्थापना गरी, असहाय, अपाङ्गता त्यसमा पनि क र ख वर्ग विपन्न, बेवारिसे बिरामीहरूको उपचार लाई पनि थप व्यवस्थित गराएको छ । उपचार सेवाको गुणस्तरीयता सँगै अस्पताल बाहिर र भित्रको स्वस्थ वातावरणले पनि यसको सेवालाई थप रहर लाग्दो र मजबुत बनाएको उपचारको लागि अस्पताल पुग्नु भएका मन्थली नगरपालिका ४ का सेवाग्राही राम श्रेष्ठले बताउनु भयो । उहाँले भन्नु भयो मैले सुनेको आधारमा यति राम्रो सेवा र सुविधा पाइन्छ भन्ने त कल्पना नै गरेको थिइन् । अस्पतालले उपलब्ध गराएको सेवाबाट आफू निकै प्रभावित भएको पनि श्रेष्ठले बताउनु भयो । आइन्दा उपचारका लागि आफू मात्र नभएर अरूलाई पनि जिल्ला अस्पतालमा जान सुझाव दिन्छु श्रेष्ठले भन्नु भयो ।
सेवालाई कसरी गुणस्तरीय र सेवाग्राही मैत्री बनाउन सकिन्छ भन्ने बारेमा आफूले चिकित्सक, अस्पताल व्यवस्थापन समितिकै बैठक र अन्य विज्ञहरु सँग पनि छलफल र परामर्श लिने गरेको पनि अध्यक्ष यम पाख्रिनले जानकारी गराउनु भयो । एक मात्र एम्बुलेन्स भएकोले समस्या बेहोर्दे आएको जिल्ला अस्पतालमा आफ्नो पहलमा भर्खरै मात्र आधुनिक उपचार प्रणाली सहित जडान गरेको थप अर्को एम्बुलेन्स पनि सञ्चालनमा आएको पनि अध्यक्ष पाख्रिनले जानकारी गराउनु भयो । त्यसबाहेक जिल्ला अस्पताल रामेछापमा हाल हर्नियाँ, हाइड्रोशील र प्रसूति शल्यक्रिया, अक्सिजन सहितको स्वास्थ्य सेवा, दन्त सेवा, आँखाको सेवा, डाइलसिस सेवा, जनरल ओपिडी सेवा लगायत अन्य सेवाहरू समेत सुचारु अवस्थामा रहेका छन् ।
अस्पतालको गुणस्तरीय सेवा र जनशक्ति व्यवस्थापनमा रामेछाप नगरपालिकाले पनि सहयोग गर्दे आएको रामेछाप नगरका प्रवक्ता समीर कार्कीले बताउनु भयो । जिल्ला अस्पतालको सेवा लाई गुणस्तरीय र प्रभावकारी बनाउन नगरपालिका उत्तिकै गम्भीरताका साथ लागि परेको पनि कार्कीले जानकारी गराउनु भयो । जसका कारण पछिल्लो समयमा जिल्ला भित्र र बाहिरका बिरामी समेत उपचारका लागि दैनिक रूपमा आउने गरेका छन् ।
यो बारेमा तपाईको प्रतिकृया